اعلان 1 اعلان 1 اعلان 1 اعلان 1 اعلان 1 اعلان 1


مقاضي رمضان يدكم معانا

الموضوع في 'ملتقى إستراحة الأعضاء' بواسطة عطر الكون, بتاريخ ‏2013-07-06.


  1. عطر الكون

    عطر الكون مراقبة إدارية مراقبة عامة

    15,600
    8
    0
    ‏2009-01-17
    كل يوم نتعلم شيء جديد
    السلام عليكم ورحمة الله وبركاتة


    صبحكم الله بالخير والعافية

    من العايدين قبل الزحمة وبعد الزحمة


    دخيلكم جيبو ورقة وقلم وتعالوا قيدو معايا الطلبات ومقاضي رمضان
    اللهم صلي على النبي


    10 كيلو دقيق فينو علشان السمبوسك والبف او البريك
    5كيلو حب حق الشربة
    درزن جبن كريفت
    ودرزن تونة
    2 كيلو سقدانة
    كرتون كريمة
    دقيق رز علشان المهلبية
    علبتين حليب لونا حجم كبير... مقاطع نيدو علين يتربو
    2 كيلو برغل
    كرتون جلي مشكل
    كم قارورة بليلة وفشار على كم كيس كربو مشكل يسير ننقنق بعد التراويح
    درزن صلصل احقاق
    ودرزن قشطة
    3 علب تطلي
    2 كيلو سمن بري علشان الفول والحلويات
    10 حزم ماسية
    6قوارير توت و6 قوارير تانج من كل شكل ولون
    روح الموز قارورتين
    وروح الزمزم قارورة هادي جديدة علشان نسلم زحمة تعبية الزمزم
    2 كيلو كنافة وقطايف
    ابزار حق الشربة وفلفل اسود وكمون وخولنجان وشيبة وقرفة وقرنفل وهيل
    من كل نوع كيلو نص مصحح ونص مطحون
    قصطير وصوفر وملاعق ورق وصحون ورق علشان الحريم لا ينهلكو في النحاس

    كرتون زيت قلي والا خليه كرتونين دحين رمضان استهلاك كل يوم اللهم صلي على النبي قلي وطبيخ
    خميرة وكربونة
    قطمة سكر
    قطمة رز ابو كاس
    قطمة رز تايلندي ( عمبر بو ) عارفينو هادا للأكل الجاوي
    مستكة للبخور
    وفحم قرض اصلي
    كرتون سفنجات وتايد وسلك نحاس وكلوركس علشان الغسيل وتدليك النحاس
    3ربط اكياس للقمايم ( الله يكرمكم ويعزكم )
    ولاتنسو اللحمة كم كيلو هبرة وكم كيلو مفرومة يسير للسمبوسك
    وازا في فلوس جيبو دبيحة تنفع مرة وحدة بدل روح وتعال
    خلاص كتبتوا كل شي والا باقي

    ها قبل لا انسى درزن قمر الدين وقعقع وصنوبر ولوز بجلي ومشمش وقلادة
    علشان نرفعها يسير نسوي دبيازة للعيد ونوزع للحبايب عمر وعافية


    صلو على النبي
    باقي شي والا خلاص لحسن مقاضي رمضان شي متفق عليه في جميع الاسر المكية خاصة والسعودية عامة
    ولكن تختلف من بيت لبيت حسب النوع والشكل والسعر
    يعني ماشاء الله تبارك الله ميزانية خااااااصة لمقاضي رمضان
    يعني لو نجي نحسب قيمة المقاضي اللي فوق يعني تقريبا مو اقل من 3000 او اكتر طبعا على حسب
    الاسعار ازا عالية او واطية وعلى حسب المكان اللي تشترو منو
    المشكلة انو مقاضي رمضان شر لابد منو
    وصعب نقول للناس لاتشترو ولا تبضعو

    يعني مني داري هيا شلمة والا داخلين على مجاعة والا خلاااااص مابدهم يندرو في رمضان
    ويعتكفوا في البيت الله اعلم
    الواحد يشتري في حدود المعقول وازا نقص شي من اي بقالة قريبة جمب البيت تقضي الغرض
    وطز في ريالين تلاتة زيادة حقت المشوار وفورة الدم وقت المغربية



    كتير من الاسر تختل الميزانية حقتها وتلاقي الناس تصيح وتلعلع وانو الراتب غلق وماعندو
    حق بكت دخان في جيبو وهادا أييييش في ناس هادي الايام كمانة
    فصلو تياب العيد وفستاين العيد وجابو كل لوازم العيد من القهوة والدبيازة علين الكولونيا ابو 3 خمسات
    وهادا غير الفواتير حقت الكهربا والتلفون والجوال يعني الراجل مسكين ينجلط
    صحيح اللي قالوه زماااااااااان البيت زي الفرن طلباتو ماتخلص جيب جيب جيب جيب



    بيقولو الحريم لمن ينزلو السوق مايعرفوا ابوهم ولا امهم بل بعضهم يملي عربيتين وتلاتة
    واللي مو مصدق يروح المستهلك والا النوري والا بن داود ويتفرج بعينو
    علشان كدة يا الحرمة تخاف الله في جوزها وتشتري الطلبات المهمة وبكميات معقولة
    والا تكتب الطلبات في ورقة وجوزها والا ولدها يجيبها من البقالة
    لحسن عندنا بعض الحريم تصيبهم الشلمة لمن يخشو البقايل تلاقي اياديهم زي الاجنحة بين الرفوف
    يلملمو ويخمشو بلا حساب وبعدين لمن يجو عند الحساب تلاقي الحرمة جريت على السيارة

    والرجال يجلس يبحلق في الفاتورة وبها عندو والا نقصت الفلوس والا يضطر ينقص من المقاضي
    طيب وليش الاحراج هادا قدام اللي يسوى واللي مايسوى
    صحيح اهل الهوى مساكين مدري اهل العقول في راحة
    قصرو اديناكم خرصكم في ادنكم وكل مين عقلو في راصو يعرف خلاصو

    وحاجة مهمة قبل ما تشتروا أي غرض فتحو عيونكم قد الريال وخلوها مفنقلة على التواريخ حق الصلاحية
    لأنو في جدة مسكو تجار الله يكافيهم خرجوا البضايع المخزنة وبيصرفوها يقلعقلهم دحين الناس بتقضي
    لرمضان اخلط قديم مع جديد والله يستر علينا وعليكم
    سامحونا على الغلبة والكلام الكتير
    وكل سنة وانتو طيبين والله يعيننا واياكم على صيامو وقيامو
    وسامحووووونا
    قبل لا تروحو خدو الهدية داري زي قلتها مع الغلاااا لكن داعتو تسلك الامور

    [​IMG]
     
  2. مكنونات

    مكنونات قلم مميز عضو مميز

    4,729
    0
    0
    ‏2011-07-11
    تدريس
    الحمدلله على النعمة ...
    العام الماضي اشترينا مقاضي رمضان ل24 اسرة محتاجة ب4 الاف ريال فقط ... في السعودية ...

    كيف حال اهل سوريا والعراق والصومال ومصر كيف حالهم وحال اطفالهم حرب وجوع يارب ارزقهم من فضلك...

    يارب لك الحمد امن وامان ورمضان ونحن في صحة وعافية وراحة بال...


    •○•○•

    مشكورة غاليتي..
    اسال الله لك التوفيق في طاعته. وزيادة في الحسنات والعفو والعافية. والخلود في أعلى مراتب جناته انت ووالديك ومن احببت أجمعين......
     
  3. مكنونات

    مكنونات قلم مميز عضو مميز

    4,729
    0
    0
    ‏2011-07-11
    تدريس
    يوم اقول 4 الاف ريال ليس من باب الرياء ولكن اقولها عشان تشوفون المبالغ اللي تروح هدر من اجل الاكل فكم عائلة راح تستفيد منها...


    اسال الله القبول
     
  4. سعيد آل شاكر

    سعيد آل شاكر عضو مجلس إدارة الموقع عضو مجلس الإدارة

    3,369
    4
    38
    ‏2011-04-08
    معلم
    و الله من الاسراف ...

    و الخوف من الموت جوع ...

    اشتريت الطلبات بـ700

    واشتريت ذبيحة بـ 800 ..

    وخلاص

    والحمد لله ...

    المشكلة أغلب الاشياء اللي يشترونها الناس ...

    ينتهي تاريخها و هم ما استخدموها


    شكراً أخت روح

     
  5. مكنونات

    مكنونات قلم مميز عضو مميز

    4,729
    0
    0
    ‏2011-07-11
    تدريس



    ماشاءالله تبارك الله .. الله يبارك لك ...
     
  6. علاوي الطايفي

    علاوي الطايفي تربوي جديد عضو ملتقى المعلمين

    83
    0
    0
    ‏2011-04-23
    معلم
    ههههههههههههههههه الله يعينا يالرجال على طلبات البيت

    ربنا يبلغنا رمضان ويجعلنا من عتقائه يااارب
     
    آخر تعديل بواسطة المشرف: ‏2013-07-17