اعلان 1 اعلان 1 اعلان 1 اعلان 1 اعلان 1 اعلان 1


ابو عبدالله وابو نايف ..!!

الموضوع في 'ملتقى حقوق المعلمين والمعلمات' بواسطة معلم ليس الا, بتاريخ ‏2015-06-04.


  1. معلم ليس الا

    معلم ليس الا تربوي عضو ملتقى المعلمين

    34
    0
    6
    ‏2012-01-23
    معلم
    السلام عليكم ورحمة الله

    ابو عبدالله وابو نايف ..
    زملاء مهنة عاشوا تحت سقف مدرسة واحدة طوال سنين عدة ..
    جمعتهم اواصر اخاء ومودة لاحصر لها ..!

    الى هنا واكتفي باستخدامي اللغة العربية الفصحى ،،
    ودعوني اكمل لكم باقي الاحداث باللغة العامية ربما يتم ايصال المعنى لحضراتكم بشكل افضل ،،

    مدرسة حكومية كبيرة بكل مافيها بمبناها ومديرها ومدرسينها ..
    كبيرة بكل شي وفيها مجموعة مدرسين سبحان من الف بين قلوبهم ..
    واكيد هنا مديرهم له الدور الاول بعد الله في هذا الشي ..!


    المهم .. ابو عبدالله مدرس دين وابو نايف مدرس لغة عربية ، زملا عمل من فترة ماهي بسيطة ..
    تعودوا على بعض .. وتوافقت سبحان الله طبوعهم مع بعض وتحابوا في الله ولله ..!

    صار كل واحد فيهم يفهم الثاني من نظرة عيونه زي مايقولون بالعامية ..
    والكل لاحظ هالشي وصار ينضرب بهم المثل ..

    بيوم من الايام ابو نايف يقول وعلى لسانه :
    ( وانا اشرح، وكان الفصل اللي اشرح فيه قريب من الادارة او خلينا نقول بالدور السفلي للمدرسة ..
    سمعت اصوات المعلمين واصوات ركض على غير العادة ،، اللي يقول شيلوه واللي يقول وش صار و..و..و.. !؟

    خرجت من الفصل وانا قلبي يرتجف سبحان الله وكأن الشي اللي حاصل يهمني امره او شي يخصني انا بالذات ..!!

    وصلت الى مكان تجمعهم واشوف اخوي وصديق عمري ابو عبدالله ممدد على الارض
    وبمنظر الله لايكتبه على مسلم ..!!

    وش فيه ياجماعة ، وش فيك يابو عبدالله يااخوان واحد يقولي وش اللي حصل ..؟!
    وانا عيني بعين ابو عبدالله وهو كذلك يطالع فيني ويده على جنبه الايسر ( القلب )
    ويتعصر من الوجع ..!!

    ماعاد اعرف انا وين انا .. يقوله ابو نايف ..
    شالوه الزملا وهو بين اياديهم يفتح عينه ويرقبني وانا كذلك ..
    وصلت المستشفى مع بقية الزملا ويعلم الله ما اعرف كيف وصلت ..؟!

    نقلوه المستشفى وكشفيات وتحاليل كالمعتاد ،، واتضح انها ازمة قلبية حادة .. !!

    قلت بنفسي الحمدلله الامر يعتبر بسيط وبحول الله تعدي هالازمة ،
    ويرجع اخوي ابو عبدالله الى بيته ودوامه عاااادي ..!

    خرجت من المستشفى الظهر وكذا بقية من كان معي من الزملا على وعد معهم انه
    بالعصر نجتمع ونروحله زيارة ونتطمن عليه ..

    وبالفعل تجمعنا بالعصر ووصلنا لغرفته ولكن ..

    مالقيناه .. يارب سترك ..!!
    زهمنا ياسستر يافلان ، ياعلان ، وين المريض وين راح .. وين ،، وش..؟!

    علمونا انه بالعناية المركزة وحالته للاسف خطيرة ..
    وماعاد عرفنا وش اللي حاصل ..

    سحبت نفسي انا وخرجت من المستشفى ولقيت ارض بحديقة مزروعة ا
    مام المستشفى وجلست بطرف جانبي منها ..

    جلست وفيني من الهم والضيقة ما الله به عليم ..
    افكر واستعرض شريط حياتي مع هذا الرجل ..!

    ويكمل ابو نايف بقوله :
    انا اعرف نفسي وواثق من نفسي دمعتي ماتنزل بسهولة
    ولا امدح نفسي ولكن نزلت العبرة غصب بذاك الوقت .. !!
    الحمد لله على مايعطي ويقسم ، ولكن اللي حصل بذاك اليوم شي
    ما اقدر اوصفه وما تحملته .. !!

    يقول جلست بدون ما انتبه للوقت الى ان نبهني صوت اذان المغرب ..
    ورحت للمسجد وصليت ورجعت للمستشفى اسال واحاول اتطمن ..
    شوي ولاني بذاك الغلام اللي يزهمني ..

    استاذ علي .. استاذ علي ،، والتفت يمه ،
    والحق يقال انني ماعرفته لكن هو عرفني ..

    عرفني بنفسه وقالي انه من طلابي وسبق ودرسته قبل 8 سنين ..
    سلامات استاذي وش اللي عندك هنا .. ؟
    ووش اقدر اخدمك فيه يا استاذ ؟؟
    انا اشتغل بالصيدلية اللي هنا امرني ..؟

    عموما شرحله ابو نايف الوضع وقاله الولد ابشر باللي تامر .. تعال معاي ؛
    واخذني معاه الى ان وصلنا قسم العناية المركزة
    واتضح ان حالة ابو عبدالله استقرت نوعا ما ،،
    ومسموح بزيارته ولكن باشتراطات ولبس معين ..!

    يقول لبست الكمامه واللبس الخاص بالعناية وانا والله ان رجولي وانتوا بكرامة ماتشيلني
    وجسمي ثقيل ما اعرف وش فيني ..؟!

    دخلت بصالة كبيرة امشي فيها ورى الدكتور امشي واطالع في المرضى يمين ويسار
    واتحمدالله على العافية وادعيلهم ..
    الى ان وصلت لاخوي ابو عبدالله ..
    قربت يمه واول ماشافني نزلت الدموع من عينه ومايقدر يتكلم طبعا
    قناع الاكسجين على وجهه وانا دارت بي الارض وماتمالكت نفسي وتغرقت عيوني بالعبرة .. !!

    انتبه الدكتور للشي ذا اللي حاصل وسحبني وترجاني انني اطلع من هنا
    وان الامور تمام ومن هالحكي ..!

    طلعت من عنده وانا الارض كلها ضايقة فيني والله لايكتب ذاك الموقف على مسلم ..!

    رحت البيت والخلق ضايق .. الحرمه والعيال يطالعون فيني مستغربين
    وبعينهم الف سؤال وسؤال .. لانني تاخرت عليهم وماهي عادتي!!

    رحت غرفة نومي وقفلت الباب ونمت ووالله انني ما اقدر اوصف نومة هذيك الليلة
    واسمحلي من وصفها ..!!

    المهم النهار الثاني داومت وانا اسال وش حصل وكيف الوضع و.. و.. و..
    قالولي انه بخير وخرج من العناية وودوه بغرفة بقسم القلب وابنه عبدالله مرافق معاه ..

    رحت للمدير في حينها ودخلت عليه ، وتوني جالس اشرحله مقدمتي للخروج قاطعني وقال
    (الله يستر عليك روح يابو نايف والمصاب واحد )..!

    خرجت ومعاي رقم الطالب اللي تعرفت عليه واتصلت عليه وقلتله يافلان
    تكفى ابي ادخل لابو عبدالله الان بأي وسيلة وبأي طريقة طالبك ..
    قالي ماطلبت شي يا استاذ .. ابشر

    وصلت عنده والله يجزاه خير طلعني بطريقته للغرفة ،
    ودخلت على ابو عبدالله ولقيته نايم ومعاه ولده عبدالله ..
    وطلعت انا وعبدالله من الغرفة وشرحلي الحاصل ..

    ما هان عليه اغادر بدون ما تطمن عليه واسولف معاه
    وجلست مع عبدالله الى ان صحى ابوه وتحمدتله بالسلامة ..
    وامزح معاه واقوله حصصك الله يحفظك ابلشتنا بالانتظار .. ماتترك الدلع ؟

    ضحكنا وسولفنا .. وبلحظة التفت يم ولده وقاله اخرج شوي ابغا عمك بكلام ..!!

    خرج عبدالله وبقيت انا وياه لوحدنا وقام يقولي عن امور كثيرة يبيني اسويها (وصية مودع )
    وانا اقوله اذكر الله يامسلم بحول الله تخرج ومافي شي اصلا ..!
    الامر بسيط وماله داعي اللي جالس تقوله ذا كله .. !؟
    قالي ارجوك كلامي لازم تفهمه وماعندي احد اعتمد عليه بعد الله الا انت وانت خابر ..!!

    جاريته لاجل حالته ووضعه وكل ماقال شي قلت ابشر ..
    واحاول امزح معاه وأسليه بقدر الامكان ..

    انتهى من كلامه ومايبغى يوصله لي ، وقلتله بعد ما انتهى :
    الله واكبر عليك كل اللي تملكه ديون بديون وش اللي عندك اجل ..؟! ههههههه

    ضحكنا انا وياه وقالي بزفرة الم لو اخذت بالي والتفت للاولاد ومستقبلهم ماكان هذا حالي .. والله يغفرلي تقصيري واهمالي بوضعهم ..

    قلتله بمزحه كذا يعني انت على بالك انك بترجي شي من ورى الراتب ذا .. ؟!

    قالي وش عليك يابو نايف ..؟ ماعندك اللي عندي وبتجيك الفروقات اللي قالوا عنها بذي اليومين وتتهنى فيها ..
    ضحكت ومقصدي اغير السالفة وقلتله :
    اي فروقات الله يسلمك .. احنا شيبان يالله حسن الختام خلاص راحت علينا ..!
    خلها تبقى عندهم وياخذونها عيالنا من عندهم ان قدرو وان ماقدرو نطلب الله احنا وهم ..

    الا اذا انك تبيها لاجل تتزوج الثانية عاد هذا كلام ثاني يابو عبدالله .. واهمسله باذنه :
    ترى ورعك هنا ولاتبلم بكلمة .. ههههههه

    قام يقولي عن احلامه ومخططاته بايام مضت ويوم سمع ان الفروقات بتجي
    ومن ذا الحكي وانه يبي يحط عربون للارض الفلانية ،
    ويبي يسفر عياله لو لمرة وحده لجده ..

    قلتله انا وانت تشوف انكم اذا سافرتوا لجدة انه ذا انجاز يعني .. ههههههه
    دايم اقاطعه بمزحه وضحكه لاجل اخرجه من الجو ذا ..


    خلصنا كلامنا .. وقالي فجأة كذا وبدون مقدمات :
    (( فيني نوم ودي انام .. وسحب طرف الغطا وغطى راسه )).. !!

    قلتله الله يجعله نوم العافية ، وانا كذلك بعد الطردة ذي ودي تسمحلي بالخروج ..
    شال الغطا وضحك من قلبه وقالي : (وداعة الله يابو نايف) ..!!

    والله ثم والله ثم والله انني بعد قال الكلمة ذي جاني شعور غريب !!
    ما اقدر اوصفه ولكن تعوذت من الشيطان وخرجت من المستشفى ..

    وكانت الساعه 11 تقريبا ورجعت للمدرسة واستكملت باقي الدوام والبال مشغول
    بكل كلمة دارت بيني وبين اخوي ابو عبدالله ..
    واحاول اطرد الوساوس من داخلي واستعيذ من الشيطان بكل حزة لكن القلب عيا ..
    ولله الامر اول وآخر ..

    خلص الدوام ورحت البيت مالي نفس بشي ..
    واتجهت للنوم وسبحان الله العادة الجوال احطه على الصامت الا بذاك اليوم نسيته او ماني بيمه اصلا ..!!

    شوي كذا والا الجوال يدق ولاني بالمدير يبلغني بأسوأ خبر سمعته بحياتي ..!
    ( ابو عبدالله يطلبك الحلة ) ادعيله بالرحمة والمغفرة ..!! ) ..

    .
    .
    .


    انتهى الى هنا احبتي الجزء الذي احببت ان أصل من خلاله الى مايهمني بهذه القصة المؤلمة ..
    ويعلم الله انها قصة حقيقية واستأذنت ابو نايف شخصيا في سردها هنا والى حضراتكم ..

    والله من وراء القصد وهو العالم سبحانه بما اكن لكم ولجميع من يحملون
    هم قضيتنا من ود واحترام ولهذا قلت وأوردت هذه القصة ومافيهامن العظة والعبر ..
    كما واسأله جل جلاله بأن يحق الحق ويزيح الباطل ..

    .
    .

    مات ابو عبدالله وما اخذ حقه وراح يموت غير ابو عبدالله وهو نفس الوضع ماتغير ..

    الموت حق ولانختلف على ذلك .. !

    ولكن السؤال هنا ليش يسوون فينا هذا كله ولاجل مين يجاملون
    بحقوق ناس خدموا دينهم ووطنهم
    وتعبوا على عيال البلد وأفنوا عمرهم من شانهم .. ؟!


    ليش احنا يشوفونا ناقصين دون الناس ..؟!
    ليش مشوهين صورتنا قدام الكل ومترصدين لنا بكل صغيرة وكبيرة ..؟!
    وهذا اسلوب قذر اتبعه من قبل ولازال يتبعه من يريد قتل قضيتنا واخراس السنتنا عن
    فضح فعلته والاعيبه القذرة واخراجها لولاة الأمر وللرأي العام ..؟!

    وللأسف يرقصون على وتر اننا على خلق ومتربين وعيال ناس ماراح نتكلم او على قولة العامة :
    (لايهشون ولاينشون ) .. ؟!

    ليش احنا بالذات اذا هرجنا وطلبنا بحق لنا ومسروق منهم .. يجعلون اذن من طين واخرى من عجين ..؟!

    من المستفيد ياترى من هذا الوضع ..؟
    وزارة المالية ..
    الخدمة المدنية ..
    وزارة الفساد والتعليم ..؟؟!
    مييين بالضبط ؟

    اتكلموا معانا وصارحونا ،، لكن تسكتون كذا ولا كأنه يعنيكم صوتنا وحالنا ،
    معناته انه فيه شي ..؟!
    واللي ببطنه ريح مايستريح على ماقالو ..!!

    ليش تسرق حقي ..؟ ولا .. تبي فوقها تجبرني انطم ما اقول ولا حرف ؟!
    في اي دين او ملة نصنف الشي ذا اللي حاصل ..؟؟!

    اقسم بالله شي يخرج الواحد من طوره ..

    خلاصة القول :
    تآمر ثلة من اللجنة التي شكلها الملك عبدالله رحمه الله
    والتفوا على النظام واخترعوا ما يسمى بالمادة 18 ..
    لا لشيء سوى لإسقاط حقنا بالفروقات المادية .. ليش ؟ ما ادري ؟!

    ولاجل تزبط معاهم الشغلة مية بالمية بدأو باظهار الجوانب السلبية لحالات
    فردية صدرت من بعض المعلمين ..
    وحاولوا العزف على وترها ومن ثم استفزاز المعلمين والمعلمات بها ومن خلالها ..!!
    وذلك بإصدار تعاميم تحمل بطياتها التهديد والوعيد ،،

    وعيانا بيانا تم اظهارها للرأي العام ..
    ليظهروا ويصوروا للعالم بان هذا المعلم دائما على خطأ وانهم (اقصد وزارة الفساد والتعليم )
    متواجدين على الساحة لردعه هو وأشكاله (ولاتخافون فنحن نسيطر على الوضع )..!!

    كل هذا يفعلونه بل وفعلوه ، لا لشيء سوى لانهم يعرفون بأن المعلمين والمعلمات
    لن يسكتوا على فعلتهم الدنيئة تلك ،،
    ولكن نحن لها وجاهزون لأسوأ احتمال .. !!

    وهذا ماحصل بالضبط وكان لهم ما ارادو ( تخطيط بغاية الدقة واللئامة) ..!!

    قامت الاقلام والالسن من الاخوة والاخوات الافاضل بعد ان طفح بهم الكيل
    وبعد وعود واماني كاذبة قيلت لهم ..!!
    قامت تشتكي وتطالب بانصاف المعلمين واعطائهم حقوقهم ..!!

    ولكن من ياترى يصدق قول موظف فاسد تحاربه وزارته وتحذر منه اولياء الامور
    والمجتمع بشكل عام وبكافة اطيافه ، وتلاحقه التعاميم والتهديدات من كل صوب واتجاه .؟؟

    بل واذكر بأنه عمل احد الوزراء خط ساخن للطالب فقط .. وعممه على جميع المدارس
    يتصل به شخصيا لتقديم الشكوى ضد هذا المعلم الفاسد .. !!
    ويُكتفى بأن يشهد عليه اثنين من الطلبة فقط واتركوا الباقي علي ..!!

    ولنكن صريحين .. انا وأياً كنت سواء ولي أمر او مسؤول أو مراقب بالدولة،
    وان كنت بمكانهم لقلت وبالفم المليان :

    (ماتستحي ياقليل الخاتمة ..؟ تشتكي وزارتك وتتهمها بالسرقة يالخسيس ،
    وانت مقصر بعملك وخاين لضميرك ) ..؟!!

    مع احترامي للجميع ..حاشاكم ورفع الله قدركم عن هذا كله .؛



    هذا هو المخطط الذي للأسف لعبته معنا وزارة الفساد والتعليم وبمباركة كريمة
    ومشاركة فعالة ممن تولوا قيادة تلك البؤرة الفاسدة جميعا من مدراء ووزراء دون استثناء .. !!

    (( هناك للاسف من لايريد لهذه القضية بأن تثار لأنه وبمجرد التفكير في اثارتها
    ستجر وراءها اناس ورؤوس كُثر ..!!
    شاركوا بالمؤامرة الدنيئة ،، وان حصل واثيرت سيكشف امرهم
    ويحالون الى القضاء بلا ادنى شك ..!! ))


    وحسبنا الله وكفى .​


    .
    .
    .
     
  2. يالله اكرمني بالنقل

    يالله اكرمني بالنقل تربوي عضو ملتقى المعلمين

    474
    7
    18
    ‏2014-10-02
    معلمه
    استاذي بصراحه قصتك آلمتني حقيقة لكن كل ما ارجوه منكم هو ان تضعو الكأس قليلا من ايديكم

    حمل الهم بشكل دائم يقصف بالاعمار

    انتبهو لأنفسكم شوي ترى الصحه ان راحت لاتعوض بثمن

    يا اخي ويا اختي ثقو بالله ماكان لك سيأتيك رغم ضعفك وماليس لك لن يأتيك بقوتك

    ارحمو ابدانكم وعقولكم من حمل هذه الهموم واتقو الله في انفسكم واجسادكم الضعيفه لاتحملونها مالا طاقة لها به

    انا اعتذر بشده لإن رأيي لن يعجبك ولن يعجبهم ولكن ياعالم صحتكم اولى مما تمرضون لإجله

    اسفه جدا اسفه

    تقدر تصلح تبليغ مشاركه سيئه اذا ماعجبك ردي
     
  3. بحر الدموع

    بحر الدموع تربوي عضو ملتقى المعلمين

    535
    0
    16
    ‏2009-01-20
    معلمة
    لاحول ولاقوة الا بالله
    والله ان عيني اغرورقت بالدموع لهذه القصة وقهراً على حالنا الذي وصلنا اليه
    حسبنا الله وكفى
    الله يرحمه ويغفر له ويعوضه ويعوضنا جميعا ان شاء الله في دار الخلد
     
  4. النجم الساطع

    النجم الساطع تربوي جديد عضو ملتقى المعلمين

    496
    0
    0
    ‏2009-02-21
    tesher
    فعلا ..... كانت بدايتهم مشكل الفروقات فقط ، حتى ادخلوا فيها الملك عبدالله رحمه الله وتم استصدار امر منه باقرب درجة هي الحل ....بعدها تورطوا ولم ولن يجدوا حل الا برجوع الحق .

    حسبنا الله ونعم الوكيل على كل من تعاون باخذ حق واضح وضوح الشمس .
     
  5. معلم فله

    معلم فله طاقم الإدارة مراقب عام عضو ملتقى المعلمين

    798
    23
    18
    ‏2011-04-21
    معلم
    الله يلطف بحالنا
    أهناك مسلم يرضىء بهذا الظلم
    الآن هذا المعلم ترك الدنيا
    وسوف يآخذ حقوقه كامله في الآخره
    وهناك الكثير غيره
    اصبحت الآن حقوق لأيتام
    اهناك مسلم يرضى بآخذ حقوق الايتام
    عجبي من دنيا فانيه
     
  6. وكيلة 26

    وكيلة 26 مراقبة إدارية مراقبة عامة

    10,049
    35
    48
    ‏2011-02-25
    .......
    وعند الله تجتمع الخصوم
    ان مااخذ حقه في الدنيا بياخذه يوم الحساب
    مانقول الا حسبنا الله وكفى ..
     
  7. العائض

    العائض تربوي جديد عضو ملتقى المعلمين

    393
    0
    0
    ‏2011-01-04
    معلم لغة عربية
    كرسي المنصب سيتحول بإذن الواحد الأحد في الآخرة نارا يصطلي بها من ظلمنا في حقوقنا
     
  8. معلم و متعلم

    معلم و متعلم تربوي جديد عضو ملتقى المعلمين

    8
    0
    0
    ‏2015-02-11
    معلم
    وعند الله تجتمع الخصوم
     
  9. عطر الكون

    عطر الكون مراقبة إدارية مراقبة عامة

    15,600
    8
    0
    ‏2009-01-17
    كل يوم نتعلم شيء جديد
    قصة مؤلمة لم أتمالك نفسي لاحول ولا قوة إلا بالله العلي العظيم ،الله يرحمه ويغفر له ، وحسبنا الله ونعم الوكيل ..
     
  10. تربوي28

    تربوي28 تربوي جديد عضو ملتقى المعلمين

    82
    0
    0
    ‏2011-05-26
    معلم
    لي زميل دفعة 1417 توفي قبل تعديل درجته بأيام ولم تعوّض أسرته ولم تستفد من التعديل لغرض التقاعد

    هناك من يحاربون القضية وليس عندهم استعداد لحلها

    كان الله في عون أصحاب القضية
     
  11. CHANEL..

    CHANEL.. مراقبة عامة مراقبة عامة

    3,262
    0
    36
    ‏2009-03-17
    معلمة
    رحمة الله عليه

    وتستمر المعاناه ويستمر الظلم

    الحمدلله على كل حال
     
  12. معلم ليس الا

    معلم ليس الا تربوي عضو ملتقى المعلمين

    34
    0
    6
    ‏2012-01-23
    معلم


    أشكر لكم تواجدكم الكريم، وأعتز دومآ بآرائكم ، وأسعد بتوجيهاتكم ..

    والله يكفينا وإياكم شر الظلم ..

    قال صلى الله عليه وسلم :
    " اتَّقُوا الظُّلْمَ ، فَإِنَّ الظُّلْمَ ظُلُمَاتٌ يَوْمَ الْقِيَامَةِ "

    رحم الله من مات ، وحفظ من بقي ..

    نسأل الله العلي القدير بأن يرفع الظلم عنا وعنكم وعن كل مظلوم ..
    وأن يبشرنا وإياكم بما يسر ويسعد القلوب،انه ولي ذلك والقادر عليه .​
     
  13. وكيلة 26

    وكيلة 26 مراقبة إدارية مراقبة عامة

    10,049
    35
    48
    ‏2011-02-25
    .......
    شاركونا من هذا المنبر
    #مليونية_إحتساب_خدمة_بند105

    ادعموا الهاشتاق فالبند اساس كل الحلول