اعلان 1 اعلان 1 اعلان 1 اعلان 1 اعلان 1 اعلان 1


هم يضحك وهم يبكي<< لمن اراد ان يغير مزاجة :)

الموضوع في 'ملتقى إستراحة الأعضاء' بواسطة أبلة إنجليزي, بتاريخ ‏2009-05-05.


حالة الموضوع:
مغلق
  1. أبلة إنجليزي

    أبلة إنجليزي مشرفة سابقة عضو مميز

    2,739
    0
    0
    ‏2009-05-02
    أبلة إنجليزي
    سلام ياحلوين
    هذي اول مشاركة لي بالمنتدى
    وحبيت ابعدكم عن جو التحسينات المشحون
    وأبيك تستانسون وتحمدون الله على النعمة اللي أغلبكم يتمتع بها في مدرسته ودوامه فيها
    إليكم بعض المقتطفات اللي مهونة علينا كل الصعاب
    والهدف هنا التسلية بغض النظر عن المعاناة الحقيقية..
    وعلى شان اللي مفتح عيونة عالمدرسات وقريشاتهن وحاسدهن اقول له (يامال الفقع لعيونك)






    في مدرسة ما وفي قرية ما لا يكاد لها وجود على خارطة محافظتها التابعة لها وكيف بالحال لو بحث عنها بخريطة المملكة
    المهم اننا اجتمعنا في هذا المكان من بدايةاالعام الدراسي كمعلمات مستجدات
    كانت لاتسعنا الفرحة بأننا متعينات تعين رسمي
    طبعآ هذي هي الحسنة الوحيدة لوضعنا اما الباقي<<ياليل بس
    وش أحكي وش اقول
    بداية بالطريق الوعر اللي ياخذ نصف وقتنا فيه شابت روسنا من كثر ماتطلع لنا الجمال فيه


    وإلا المدرسة ومبناها المتهالك اللي لايحمي لامن برد الصحراء ولا من حرها وغير كذا انه يفقد كافة مقومات الحياة اولها انقطاع الجوال بشبكاته الثلاث
    وماطور الكهربا وما ادراك مالماطور اللي ذلتنا عليه فراشتنا ذل كنه ماطور ابوها تقفل وتشغل فيه ولا اكبر مهندس كهربائي خبير!!
    هالخالة حكايتها حكاية ام اللقافة فيها وحب السيطرة والتحكم ناهيك عن صفة (التحريش):والتحريش في قاموس النساء يعني نقل الكلام
    وياليتها تنقل الكلام بيننا لكن تهدد بأنها توصل اي شي للأشراف على قولتها ولد خالة بنت عم جدة جارتها يشتغل هناك وبتعلمة علينا ان طرينا مجرد طاري اننا ودنا نكسل السادسة ونطلع<<لاحظوا انها السادسة لأن السابعة أساسآ مافيه اغلب الوقت مقدمة

    زيادة على هذي الصفات كلها عندها دراية وعلم بكافة التعاميم الضدية< والضدية هنا يعني ضد المعلمة وتعاميمنا ماشاءالله ضد المعلمات على طول
    ولذلك سميناها فراشة برتبة مديرة
    وقررت اعطيها دكتوراه فخرية في حرق الأعصاب ونسج القصص المرعبة لتنضم للهندسة(إذا انتم لسة خابرين موضوع ماطور الكهرباء :) )
    وإذا مره مره ماسوت شي لنا قامت تحكي من نسج خيالها قصص اسطورية وخرافات عن:
    *سنة من السنين جانا السيل بالمدرسة وشال البنيات وكم أبله <<إذا كان الجو مغيم

    *ويوم طلع لنا الحنش اللي طولة 70 متر وقرص بنتين وأبلتهم<<إذا شفنا عقرب او ماشابهها من الزواحف

    *ويوم طاح السور الخلفي مع ا(الحايه)<<يعني العج
    وكسر رجل بنت و(فقش راس )الأبلة والمديرة<< اي شج رؤوسهم
    هذا يوم يكون الجو به عج وغبار

    وسواااااالف ماتنتهي تخليني احلف في قرارة نفسي اني لورجعت لأهلي سالمة ما أطبها ثاني بالناقص هالعيشة وهالرعب
    وربي وانا صغيرة كنت اشرد من بيت الرعب لاشفتة بالملاهي هالحين كتب علي اقضي نصف يومي فيه

    هذا كله كوم وغير يوم جا الأشراف كوم ثاني
    تعليقاتهم انه ليش مدرستكم جرداء ولا لوحة فيها <<على بالهم مدارس المملكة والا المنارات ! :(
    مادرو انه كل مادقينا مسمار طاح المسمار باللوحة بقطعة يحبها قلبك من الجدار على راس الملقوفة اللي تبي تحسن وضع المدرسة!

    وليش المقصف كذا
    كله مخالف<< قلنا بصراحة البضاعة من بقالة شهير البنغالي جار المدرسة وهذي امكاناته مانقدر نطور اكثر
    لأنه اقرب شي لنا ولا ابن امه يبي يوصل لنا في هالجلد


    <<وشهير هذا له مواقف عدة وهو نشمي مايقصر ينفعنا
    دوم
    مرات كثيرة يعبي لنا ماء من خزانة ان انقطع عنا الماء و يشيل اغراضنا التقيلة مثل آلة التصوير<< لا يروح بالكم بعيد تراها عديمة فائدة لعدم وجود الكهرب بس نستخدمها لتصوير اسئلة النهائي

    ومواقف شهير كثيرة على الرغم انه بنغالي بس الصحراء طلعته رجال

    نرجع للموجهات وملاحظاتهم تغث و وجودهم مغثه على قولة فراشتنا (المفتشات)
    إلا على طاري فراشتنا ماقلت لكم شلون لهيناها لين راح التوجية
    وكيف قدرنا على هالفراشة (المهندسة الدكتورة المديرة) وافتكينا من (حرشتها)<<سبق ترجمتها

    اكيد ودكم تعرفون كيف
    هذا اولآ واخيرآ يعود لمجهوداتي خليتها تشغل موترها(اخس يالرجالة) وتروح بيتها تجيب علاجها وعلاج امها اللي لها شهر ازعجتني تبي اقراه لها لأني ابلة عنجليز(بالمناسبة هذا سر تسميتي هنا في المنتدى)
    و وقتها كنت اصرفها
    و جا وقت استغلها واشغلها عن مهنتها الأصلية(اللقافة)
    وجابت الأدوية وانا اقرأ عليها واعطيها بالدجل والخرط والنظم ولا أكبر دكتورة<<حسيت نفسي اني مريم نور
    وانفلب السحر على الساحر
    ياني لعبت بحسبتها وخليتها ماتشوف الدرب <<احسن اجل تعرف كيف تخوفني وتقول سيل وماسيل وعقارب وحوانيش وغيرها تستاهل اكثر بعد :)
    تراني مو مجرمة ولا شريرة بس هي حدتني عالإجرام :(

    اما ترجمة الروشتات فهي عجب عجاب اخترعت الامراض اللي قلتها خبط لزق: فرجاء لاحد يضحك لأن اي شي يخطر ببالي اقوله بلا ترد
    (نيرسيسو<اسم عطري كان قدامي //وليم شكسبير <طرا على بالي/ و رونالدينهو و كاكا
    وحتى بيكنباور ومالديني مانسيتهم :)
    <<أخس طلعت رياضية وأنا مادري
    ولو ماشفت الخوف بعيونها كان قلت ماردونا وبيلية

    وفوق هذا قلت لها اخطر شي هو (منيستري اوف اديوكيشن) <<عاد مدري وش خربطت عليها وهي مفجوعة من هالأمراض هذي وقالت الدختور يسذب علي اجل يقول مابك الا روماتيز وطلع كل هذا مكتوب بالعلاج!!

    وأنا قلبي يتقطع عليها بس يوم أذكر قصص الرعب ا قول تستاهل خل تتربى وتتوب
    ويوم أذكر تحريشها اكون اكثر اصرار على اشغالها
    ومن بعدها صارت كل يوم مجمعة ادوية عجز قريتها تبي اقراها لها <<وانا حاسة انها تتاجر بهالشي يعني امتهنتها مهنة بمقابل<<شريرة تسويها
    بس انا ارفض اترجم واقول الوعد لا جا التوجية!!وهي مو دارية وش الطبخة




    هذا غيض من فيض ليومياتنا في المدرسة انا وزميلاتي
    وفراشتنا العزيزة


    آسفة طولت بس هذا مع الإختصار
    ولو تبون احداث اخرى انا جاهزة بس بشرط تطلبون وانا بالخدمة
    ^الأحداث السابقة حقيقية100 %




    تحياتي
    دمتم بود
    أبلة عنجليزي
     
  2. باسل الماجد

    باسل الماجد تربوي جديد عضو ملتقى المعلمين

    2
    0
    0
    ‏2008-12-22
    الموضوع في وقته وسط ها الأخبار المحزنة .....

    ذكرتيني بالفراش أيام كنت أدرس بالثانوي كان يخوف المعلمين أكثر من المشرف ....

    وننتظر المزيد من يومياتكن أنتي وبقية المجموعة .:36_1_19[1]:
     
  3. ابولندا

    ابولندا تربوي فعال عضو ملتقى المعلمين

    1,866
    0
    36
    ‏2008-03-01
    م
    الحمدلله على سلامتك من الحنش يا ابله
     
  4. رهف12

    رهف12 تربوي جديد عضو ملتقى المعلمين

    371
    0
    0
    ‏2009-02-09
    معلمة
    أهلا بك بيننا واضحك الله سنك أختي وسلمكن الله وحماكن من كل مكروه.
     
  5. يارب عفوك

    يارب عفوك تربوي جديد عضو ملتقى المعلمين

    468
    0
    0
    ‏2009-02-14
    يعطيك العافية اختي تخصصك انجليزي ؟ وناطلينك في قريح اجل وش خلوا لاهل الدين والاجتماعيات والفنية ؟ والبدنية ؟ اكيد في المريخ . على العموم والله شديتني بالله زيدي من هالقصص والحكايات اللي تصير لكم . تصدقين ذكرتيني بأيام نجران ههههه بس بصراحة ايام حلوة .راح تذكرينها لما تنقلين الله يسهل لك . وخذي الدعوة بسعة صدر اختي لابد يوم تقولين الله اكبر على تلك الايام . تحياتي لك .
     
  6. فهد بن حويس

    فهد بن حويس تربوي جديد عضو ملتقى المعلمين

    131
    0
    0
    ‏2008-11-25
    معلم
    big bayrah......!
     
  7. رنووودي

    رنووودي عضوية تميّز عضو مميز

    3,529
    0
    0
    ‏2009-01-25
    معلمة وافتخر
    ياحبيلتس

    ذكرتيني بايامي وانا في عفيف من هالقصص انبسطي ولاتفوتين لحظه بتندمين لاجيتي المدينه يابختس

    دمتي بود
     
  8. أبلة إنجليزي

    أبلة إنجليزي مشرفة سابقة عضو مميز

    2,739
    0
    0
    ‏2009-05-02
    أبلة إنجليزي
    صباح الخيرات
    ألف شكررر على مروركم الكريم
    سعدت بردودكم جميعآ

    big bayrah??
    لم افهم بعد قصدك ‏bayrah‏ هذه انجليزية وإلا ايش؟
    :)
     
  9. teacher2006

    teacher2006 أبــو فهـد .. عضو مميز

    9,954
    0
    0
    ‏2008-09-12
    teacher
    أهلا بك بيننا واضحك الله سنك أختي وسلمكن الله وحماكن من كل مكروه.

    موفقة بإذن الله ... لك ِ مني أجمل تحية .
     
  10. كہ_ٍـٍہاسـر_ٍـ

    كہ_ٍـٍہاسـر_ٍـ تربوي جديد عضو ملتقى المعلمين

    47
    0
    0
    ‏2009-05-03
    ذكرتيني قبل 3 سنوات يوم نداوم بقريه 40 كيلو نفود والله متنا الله لا يعيد هكسنه ولا القريه مايتوفر فيها شي حتى الخبز نجيبه معنا يوم الجمعه الى الاربعاء والمدرسه حذث ولا حرج الله يعينتس بس ويصبركم انتم وفراشتكم المصون هههههههه
     
  11. أبلة إنجليزي

    أبلة إنجليزي مشرفة سابقة عضو مميز

    2,739
    0
    0
    ‏2009-05-02
    أبلة إنجليزي
    اجل بس تاخذون خبز معكم<<والله انكم طيبين
    مادريتوا عن قشنا اللي ناخذة مدرستنا!!

    قلك مسافرات يادافع البلا
    خلوها مستوره بس :)
     
  12. ريموو

    ريموو تربوي جديد عضو ملتقى المعلمين

    270
    0
    0
    ‏2009-03-10
    معلمة
    ياربي والله كلنا قاسينا ورحنا لأماكن من شدة غرابتها وبعدها صرت احلم فيها
    احلام مخيفة لفترة لكن إن شاء الله تنقلين وترتاحين وتصير هالمدرسة مجرد ذكرى
    ويعطيك العافية عالسرد المشوق .
     
  13. الربيع22

    الربيع22 تربوي جديد عضو ملتقى المعلمين

    155
    0
    0
    ‏2008-11-23
    معلم
    الله يضحك سنك
    ذكرتيني بالفراش اذا كان المكيف شغال يحرم دول الغرفة عندنا
     
  14. معلم ضغط عالي

    معلم ضغط عالي تربوي جديد عضو ملتقى المعلمين

    255
    0
    0
    ‏2008-07-08
    معليك من العجوز راس مالها علبة معمول وخط البلده



    :36_1_1[1]: وتسلك امورك:36_1_1[1]:
     
  15. والاس-أبوياسر-

    والاس-أبوياسر- عضوية تميّز عضو مميز

    1,225
    0
    0
    ‏2009-02-01
    معلم
    حياتس الله

    وبعدبن زعلتيني نسيتي ميسي وكرستيانو وماتيرازي والشلة الحلوة

    بس والله حرام عليك خبلتي بالفراشة الله يهديك
     
  16. معلم الجيل الثالث

    معلم الجيل الثالث تربوي جديد عضو ملتقى المعلمين

    288
    0
    0
    ‏2009-05-05
    معلم
    وتبقى الذكريات الجميلة
     
  17. الأسطورة

    الأسطورة تربوي جديد عضو ملتقى المعلمين

    13
    0
    0
    ‏2008-01-18
    الله يحفظك من كل مكروه آآآآآآآمين
     
  18. أبلة إنجليزي

    أبلة إنجليزي مشرفة سابقة عضو مميز

    2,739
    0
    0
    ‏2009-05-02
    أبلة إنجليزي
    بصرررراحة من جد مشكورين ماتوقعت احد يتفاعل معي كذا..


    اما معمول وخط البلدة هذي حكاية<<بس هي تراها ماتحب المعمول ماتاكل غير ريكو والا سمسم اليابس اللي يكسر الضروس<<هذا حلا قهوتها :) الله يديم النعمة


    اشكر كل من مر على موضوعي وترك بصماته فيه،،


    كلماتكم ومواساتكم ودعواتكم الصادقة زادتني حماس ان اكتب بعض المقتطفات الأخرى


    أنتظروا أبلة عنجليزي
    في حلقة (حركة النقل)
    ‏<‏<مصدقة روحي اني ام بي سي وهذي الإعلانات لباب الحارة :)
     
  19. المسافة

    المسافة تربوي جديد عضو ملتقى المعلمين

    20
    0
    0
    ‏2009-05-06
    معلم

    والله انك زااااااحفة
    ننتظر حركة النقل
    تحياتي ,,:36_1_1[1]:
     
  20. أبلة إنجليزي

    أبلة إنجليزي مشرفة سابقة عضو مميز

    2,739
    0
    0
    ‏2009-05-02
    أبلة إنجليزي
    اجل زاحفة<<لم افهم بعد


    اما حركة النقل خلوني اجهزها وقريب جدآ كم ساعة بإذن الله تكون موجودة
    مع مفاجأت آخرى
     
حالة الموضوع:
مغلق