اعلان 1 اعلان 1 اعلان 1 اعلان 1 اعلان 1 اعلان 1


الي ينعاف أوله ... ينعاف تاليه .... رحلة النكسة ....في بيروت ...

الموضوع في 'ملتقى إستراحة الأعضاء' بواسطة مـنـاحـي, بتاريخ ‏2008-07-24.


  1. مـنـاحـي

    مـنـاحـي عضوية تميّز عضو مميز

    9,407
    60
    48
    ‏2008-01-18
    ذكر
    رحم الله من مات مني ..!
    بسم الله الرحمن الرحيم

    السلام عليكم ورحمة الله وبركاته

    أسعد الله كل أوقاتكم بالخير والرضى ...

    كما يسرني أن أقدم لكم .. هذه الحلقة من أحدى فنادق العاصمة اللبنانية بيروت ... وكذلك الأحداث العصيبة التي مررت بها أثناء تواجدي هونيك ..

    والله ياجماعة الخير ... خويكم ( موصاحي ) راح للبنان عشان يقدم في برنامج ( استار أكاديمي ) قلت كود أني أشتهر ويصير لي معجبين ومعجبات .. وناكل معهم تونه ومعجنات << وش جاب التونه عند المعجنات ..

    الموهيييم .. توكل على الله وجمعت أوراقي .. وحطيتها بملف أخضر علاقي .. مثلكم خابر السعودي مايفارقه هالملف بكل مكان وبكل زمان .. عاد الطلاب والطالبات تخرجوا هالسنة وبدأ سوق ( الملف الأخضر ) وتصوير الأوراق . الله يكون بعونهم ...

    مير وأنا الي أحجز على ثاني رحلة لبيروت ( طفشنا من كلمة أول رحلة خلونا نغير ) وأضبط وضعي وأجهز ملفي حطيت فيه شهاداتي وكل خبراتي ورخصتي قلت يمكن أنهم يخلوني أسوق الباص حقهم وقت التمشيه ... واجهز بعد شنطتي وأخذ ملابسي حق رحلتي لمصر قبل سنة قلت يمكن يقولون نبي نشوف شكلك ( بالأفرنجي ) يعني بالزي اللبناني ...

    جاء موعد الرحلة من مطار الملك عبدالعزيز بجدة ... مالكم بالطويلة ووش صار في المطار ولا الي صار قبل المطار بقولكم الي عليه العلم وحنا بالطيارة ..

    جلست بمكاني حسب المكتوب على البوردنق .. وشوي الا جلس على يساري رجال ملتزم وهادئ وجهه منور والضحكة على محياه سلم ورديت عليه السلام وجلس بمكانه .. واخذنا شوي الا يجي جنبي واحد عسكه تماما .. ( عاد بتعرفون وشلون هذا عكسه في أحداث القصة ) ويجلس على يميني وصرت أنا بالوسط << اجل قدام

    جلسنا واخذنا شوي الا ويقول الطيار يامرحبا بكم كلكم والحين ترانا بنقلع من غير شر وكل واحد يحتزم بالحزام الي عنده ولا تورطونا مع الشركة .. وخلوكم سنعين وتقهووا ( عاد يوم قال تقهووا .. حسبته الطيار هو الي بيقهوينا ) ..

    أقلعنا وما أستقرت الطيارة بالجو ... تعرفون لازم يكون فيه احتكاك بلي جنبك مهما كان جنسه أو جنسيته ... المطفوق الي على يميني ألتفت علي وقالي .. الأخ سعودي .. قلت لا والله باكستاني تجميع سعودي ... وش رايك كل هالرزه والتكشخ وتقول سعودي ... الله يصلحك
    قالي لا والله بس حبيت أسأل بس لا تكون زعلت .. قلت لاوالله خاطري وسيع اخذ راحتك قالي تسلم الله يخليك ..

    المهم سكتنا شوي .. ونط ثاني مره وقالي .. ممكن أسألك .. قلت تفضل آمر . قالي أنت وش عندك بلبنان ..قلت والله رايح أجمع حديد هناك .. عاد الدلخ صدق أني بجمع حديد .. قلت والله رايح أقدم على ( استار اكاديمي ) قال صدق والله قلت أ]ه وش فيها رجال عندي مواهب ماهوب موهبه بس وبعدين احس اني باخذ الأول عليهم .. << أووخص يالواثق .. لا يكثر بس ..

    وبعد ما علمت المطفوق .. ألتفت علي أخونا .. الي على يساري وقالي .. ممكن أشارككما الحديث .. ( عاد قلت بنفسي أهلا وسهلا بأهل الكوفة ) الرجال بدايته قوية بكلامه هذا .. وتوني بقول تفضل الا المطفوق ينط ويقول اكيد ماعندنا مانع طالعت فيه بغيت اصفقه على جبهته الا هو يطالع فيني وفاتحن كشرته يتبسم :D.. قلت مثل ماقال الأخ ... وهو ينط ويقول علوووش أسمي علوووش ...

    قال الرجال ونعم فيكم كلكم ... معكم أخوكم أبو حاتم ... عاد أنا استحيت منهم كل واحد قال اسمه الا انا قلت وانا اخوكم موصاحي قال علووش أما موصاحي .. وقعد يضحك وفضحنا بالطيارة كلها قلت ياخي لا تضحك بقوة بشويش ياعلووش يابعدي .. قال ابو حاتم كاني سمعتك قبل شوي تقول أنك بتقدم في برنامج استار اكاديمي قلت مايحتاج.. الله لا يعوق بشر مقدم عليهم مقدم .. قال ياخي بارك الله فيك لقد صدرت فتاوي كثير بهذا الخصوص وهذا البرنامج والذي يعرض فيه وانه حرام وفيه اختلاط ومنكرات وأنت من بلاد الحرمين الشريفين وتبي تمثل بلادك في مثل هالبرنامج ... المهم الرجال كثر الكلام والنصايح .. قلت له الله يجزاك خير أنا بديت المشوار خلاص وماعاد أني بمهون ...

    نط علوووش وقال يا شيخ الله يهديك خل خوينا يجرب حظه بعدين واضح عليها أنه بيفوز .. خله يجرب وش هو خسران .. عاد علووش يحسب نيتي شينة وهو يقرب مني ويقول أعرف ليش تبي تشارك تبي لا فزت يصير عندك معجبات .. ويقولها وهو يغمز بعيونه الصغار وأطالع فيه وأقوله ياربي لك الحمد والشكر ...

    المهم على سوالف علوووش الا المضيفة تقول وش تبون من أكل عاد علوووش جالس على الممر وقعد يتفلسف يقول ماعندكم مضغوط حاشي ويقولها وهو يضحك على باله يقول نكته ... وأشوف وجه المضيفه وبقلبها كلام تبي تقوله وأكيد أنها تقول ياربي لك الحمد والشكر عطونا اكلنا وأكلنا وخلصنا وخوينا ابو حاتم جالس يقرأ بالأذكار الله يجزاه خير ..

    وبعد شوي علمنا الطيار أنه راح نهبط بمطار بيروت بعد دقايق .. استعدينا للهبوط وقالي ابوحاتم انا بسكن بالفندق الفلاني وانت وين بتسكن قلت بشوف مكان استقبال الطلبات ببيروت وبسكن قريب منه حتى علووش قال وانا بسكن مع ابو حاتم وقلت الحمدلله فكه منكم الأثنين .نزلت الطيارة ودخلنا المطار وودعنا بعض .

    أخذت تاكسي وقلت له تعرف وين مكان التقديم على برنامج استار اكاديمي قال ولووو خيووو أكيد بعرف قلت اجل وصلني لهوونيك الله لا يهينك حركنا وقالي اللبناني .. الأخ سعودي قلت ياخي ثاني واحد يسألني ليش ملامحي أوربية ولا صينية قعد يضحك اللبناني وقال شو مهضوم أنتا .. قلت ماعليك زود طال عمرك .. قال بس من الزي تبعك واضح أنك سعودي .. قلت الله الله أنا سعودي الأصل والمنشأ قالي طيب ولك خيو بتئدم ع البرنامج بهيك ملابس .. قلت ايه وش فيها ... قالي ما راح يئبلوك ... قلت وليش إن شاء الله قالي لازم تلبس جينز وبلوزة قلت انا ليكون بعد البس تنورة وارد شعري على ورا واحط مكياج وشبصات قال لا لاتتفهمني غلط خيووو .. قلت الله يرحم والديك انا تعبان وصلني ولا تكثر حكي .. سكت اللبناني وبعد شوي وصلنا لفندق قالي هذا هو مكان التقديم قلت ياخي هذا فندق ماهوب مقر البرنامج قال ايه هوا مقر التسجيل وشوف بعينك الإعلانات برا الفندق ..

    وطلع كلامه صحيح .. حاسبته ونزلت .. ثم دخلت للفندق وحصلت بكل زاوية إعلان للبرنامج .. رحت للأستقبال أبي أسألهم عن مكان التقديم ومنها بأخذ لي غرفة بعد ... وقبل ما أوصل لهم ألا أسمع الي ينادي بصوت عالي يقووول .. موصاحي .. موصاحي ... قلت بنفسي من الحين بدت الشهرة ياولد:D ... ألا وألتفت وأحصل هذا علووش يطالع فيني ويبتسم وجنبه أبو حاتم .. جالسين في بهو الفندق والله وأجيهم وألقي عليهم السلام وأجلس معهم وأقولهم وش جابكم هنيا .. قال أبو حاتم هذا الفندق الي دايم أسكن فيه قلت ماشاء الله أجل راعي لبنان أنت تحب بيروت ياشيخ .. قال أجي أستمتع بالطبيعة والجنة في الدنيا فقط .. ويتدخل الشيخ علووش ويقول شوفوا الي هناك قاعد يكلم البنت قلت ياخي وش دخلك في الناس تراك بلبنان والوضع فري طبيعي هالشئ .. قال لا مو طبيعي هذا سعودي الي مع البنت قلت طيب وخير ياطير واذا كان سعودي .. قال لا أنصحه قلت ياشين اجلس خله في حاله مالك شغل بالناس أنتم مهمتك تراقب خلق الله .. منت بوصي عليهم .. كل واحد حر بتصرفاته أركد خل عنك اللقافة .. قلت ياشيخ ابو حاتم وش رايك في كلامي صحيح ولا لا كل واحد حر بنفسه قال الله يهديه يكلم أمرأة ليست محرم له والعياذ بالله وأبليس يجري مع الإنسان مجرى الدم ... قلت يابن الحلال وراك قلبت السالفة محاضرة ياخي يمكن أنه يسألها عن شئ ..

    وسألتهم عشان أغير السالفة .. الا وش مجلسكم هنيا ... قال علووش والله الشيخ يقول خلنا نجلس هنيا شوي لين تجي ( داليا ) قلت من داليا قال علووش .. هذي يعرفها الشيخ ... قلت أوووخص صديقتك يعني يابو حاتم قال أعوذ بالله وش هالكلام لا ماهيب صديقتي هذي موظفة هنيا بالأستقبال ... وأحتريها عشان أخذ منها غرفة قلت طيب الأستقبال فيه أثنين موظفين الحين مثل منت شايف وراك ما تحجز من عندهم قال لا داليا أنا مكلمها قبل لا أجي وأكيد أنها قد حجزت لي غرفة ... قلت ماشاء الله مكلمها بعد طيب توك تقول على الرجال الي يكلم حرمه أنه مايجوز وأنت تسوي مثله قال انا كلمتها للضرورة وليس للسوالف معها في مجال عملها ... قلت ايه هين يا مجال عملها .. طيب وراك ماتروح للي بالأستقبال وتسألهم إذا فيه حجز بأسمك بدال منت معطل نفسك وجالس تتنظر داليا ... قال لا أفضل أرتاح شوي وبعدين بروح لهم ..

    نط علوووش وقال شوفوا الي هناك معه حرمتين ... وجالس يضحك معهم والله أنه مايستحي قلت ياخي وش فيك أنت فيك شئ تحس بشئ مريض عقلك فيه شئ ياخي خل الناس في حالها جلس مع حرمتين ولا مع عشرة مالك دخل فيه ... طيب إذا أنت خايف من شئ رح وأنصحه لا تقعد تزعجنا كل شوي شف هذا وشف هذي ... خلك رجال ورح كلمه وقله الي عندك لكن تقعد تقز بخلق الله وتحش فيهم ما يصير ياخي ...

    أبو حاتم ساكت وجالس يتلفت يمين ويسار ... كأنه يدور على شئ ضايع منه .. وفي لحظة صمت قام أبو حاتم قال هذي داليا جت بروح أشوف حجزي عندها .. ألتفت على مكان الإستقبال الا هاذيك البنت الي ما ودك تنزل عيونك عنها من جمالها وصفاء بشرتها قلت بنفسي ايه هذا هو الجمال اللبناني ماشاء الله عليها .. نط علوووش قال والله ابو حاتم عليه ذوق ماهوب صاحي عرف يختار قلت ليش زوجته هي قال لا بس اكيد صديقته قلت لاتظلم الرجال يمكن من كثر مايجي لبنان صارت معرفة بينهم وتوفرعليه الوقت بالحجز خل نيتك طيبة ياعلووش

    طول ابو حاتم عند داليا وانا وعلوش نراقب الوضع من بعيد ونشو وشلون داليا تتبسم بوجه ابو حاتم وهو الأمر طبيعي عنده يعني لو واحد منا انا ولا علووش سوا هالحركة كان أقام علينا الحد يادافع البلا ... الظاهر أنه يحسب أن الشيطان ما يقدر على الشيوخ وحاط حيله في الي مثلنا ... أقول يمكن والله أعلم ..

    المهم رجع لنا أبو حاتم وقال ترا حصلت حجزي أوكي وكلمت لكم داليا ووصيتها عليكم .. قلت ماقصرت يابو حاتم وأنا بروح لها الحين لأني أبي أحد يقولي وين مكان التسجيل عشان أسجل قبل لا يقفلونه قالي أعوذ بالله مازلت مصر على عمل المنكر خاف لله ياخي عاد انا ماعاد فيني صبر عليه هو وحركاته قلت الحين انا من وحنا بالطيارة وانت مزعجني حرام ومنكر وخاف الله ولك ساعة وانت تنتظر داليا وتقولي حرام والي تسويه ماهوب حرام تكلمها بالتليفون وقاعد تضحك معها يعني الي تسويه انت حلال وحنا الي نسويه حرام ياخي اتق الله في نفسك وخلك بحالك سجلت ولا ماسجلت مالك شغل .. وقمت من عنده هو وعلووش .. ورحت للأستقبال وتركت داليا الي يقول عنها وكلمت الرجال الي بالأستقبال وسألته عن مكان التسجيل وقالي بالدور الرابع تحصلهم لكن مايكونوا موجودين الا بعد الساعة 8 صباحا يعني ما فيه الا بكرة الصباح قلت مو مشكلة الحين عطني غرفة وخلني ارتاح والصباح رباح .... جاني علووش وانا اكلم الرجال قالي لا تزعل من ابو حاتم تراه يبي الخير لنا والرجال خايف علينا هو يقوله يقول خايف عليكم من الفتنة قلت الفتنه ليش ما تجيه هو ولا هو عنين مايقدر يسوي شئ .. عشان كذا ما خذ راحته .. قال يارجال خلاص خله في حاله .. المهم قالي الموظف خذ هذا رقم غرفتك ( 417 ) عطيته حسابه واستأذنت من علووش قالي يارجال فلها وربك يحلها خلك كوووول ياموصاحي يانجم استار اكاديمي على باله يبي يرفع من معنوياتي طلعت للغرفة وحاولت انام ولا قدرت جالس افكر في ابو حاتم هذا وشلون يحلل ويحرم علي كيفه ويسوي الي يبيه ويقول حلال والي يسوونه خلق الله حرام عجييب امره والله ...

    قفلها معي ابو حاتم هو تصرفاته واسلوبه الهمجي وغير كذا علوووش الي مايخلي احد بحاله يراقب الناس وكانه ولي علهم ولا مكلوف فيهم والمشكلة انه ما يواجهم وجها لوجه لا زي ما تقولون يتصيد عليهم شف ذا وشذ هذي ومرق اعصابه على شئ مايستاهل والله الظاهر انه مريض ابن الحلال عليه قل صحة ...

    نمت وفي الصباح اخذت شنطتي مثل ماهي ولا فتحتها ورحت للمطار وقلت لهم اقرب رحلة للسعودية ماعاد نبي نسجل في استار اكاديمي الي ينعاف اوله ينعاف تاليه .... خل لبنان لأبو حاتم وعلوووش ... وفكه منهم الأثنين ..... والسلام عليكم ..



    خارج النص :

    امريكي يسأل قروي can u help me
    قال القروي والله مافهمتك بس أحتياطاً كل تبن



    خويكم

    موصاحي
     
  2. رتانيا

    رتانيا مشرفة سابقة عضو ملتقى المعلمين

    4,662
    0
    0
    ‏2008-01-13


    ما شاء الله ,,,

    أسلوب رائع,,, مشوق,, تسلسل ممتع,,,

    قصة جميله تتضمن الكثير من الإشارات لممارسات خاطئة في حياتنا,,

    وتعكس الكثير الكثير من التناقضات التي نعيشها مع انفسنا ونحو الآخرين,,,

    أحييك أخي ,,,, مو صاحي ,,,

    على هذا الطرح المميز ,,, والذي يجبر القاريء على متابعته بشغف وابتسامة

    لأسلوبه الجميل خفيف الظل,,

    والحمدلله رب ضارة نافعة,,, الشيخ ابو حاتم ما قصر بتناقضاته

    سد نفسك عن ستار أكاديمي,,,

    تقبل مروري واعجابي وننتظر المزيد,,,




     
  3. خفايا .. حزن ...

    خفايا .. حزن ... <font color="#008080">أديب الملتقى</font> عضو مميز

    330
    0
    0
    ‏2008-01-19


    أخي // موصاحي


    من المؤلم .. أن نجد أن بعض .. شبابنا .. يبحث ...
    عن الشهرة .. والبعض الآخر .. يبحث ...
    عن التقليد .. مجرد التقليد ...
    لـ يلفت .. إنتباه .. الغير .. لهم ...
    ولا يعلمون .. هولاء ...
    ما تلك .. الإلتفاته .. ما هي إلا نقص .. بداخلهم ...


    رائع أخي بطرح الفكاهي المطول ...
    والله يسعدك يارب ...
    لك كل الشكر ...


    صمتي .. سؤال !؟

     
  4. تــهــا111ويــل

    تــهــا111ويــل تربوي مميز عضو مميز

    6,990
    0
    0
    ‏2008-01-27
    طالبة

    ههههههههههههههههههه

    والله حلوة الرحلة ياليتك رحت وخليتنا نشوف وش مواهبك

    وانا بصوت لك وبشجعك حتى لو ماعندك موهبة ههههههههه
     
  5. أبو فيصل السبيعي

    أبو فيصل السبيعي عضو مجلس إدارة الموقع عضو مجلس الإدارة

    3,554
    0
    0
    ‏2008-01-03
    معلم

    حلوه ياموصاحي

    أعجبتني هاي الأوصة

    نقاط من الأوصة

    - الملف الأخضر والبطالة حلوووووووووووووووو

    -البحث عن الشهرة والمعجبين بغض النظر عن الطريقة

    - تطرق للحجوزات وما أدراك مالحجوزات

    - تطرق لأزمة الحديد وسرقة العمال لحديد الخردة

    -طريقة ابو حاتم (لا تنهى عن خلق فتأتي بمثله عار عليك إذا فعلت عظيم)

    يعطيك العافية موصاحي

    لاتحرمنا من هالقصص المشوقة جداً


    تحياتي


    ملاحظة أخت ملحوظة :


    (( اللي هذا أوله ينعاف تاليه))
     
    آخر تعديل: ‏2008-07-25
  6. عبــدالله الشــريف

    عبــدالله الشــريف إدارة الملتقى إدارة الملتقى

    3,471
    1
    0
    ‏2008-01-03
    معلم
    أستااااااااااااااار أكاديمي مرة وحدة .....!!

    والله منت بسهل .......!!

    ولا علمتني أنا وعسااااااااااااف نخاويك يمكن يقبلونا ....!!

    مشكور على القص الجميلة ...!!
     
  7. فارس الزعيم

    فارس الزعيم قــلم حــر عضو مميز

    2,161
    0
    0
    ‏2008-06-15
    حكومي
    مو صاحي اسم على مسمى

    قصه جميله ومعبره وفيها سرد لعدد من السلبيات الموجوده في المجتمع

    يعطيك العافيه ياستار فايف
     
  8. بدر البلوي

    بدر البلوي المدير العام إدارة الموقع

    15,725
    110
    63
    ‏2008-01-03
    الله يسعدك ولا يبعدك عنا

    اسلوب مرح جدا فى الطرح

    مشوق جدا

    تسلم يا عسل
     
  9. وارث الطيب

    وارث الطيب عضوية تميّز عضو مميز

    1,530
    0
    0
    ‏2008-05-17
    معلم
    قصة رائعة تبين بعض الممارسات والتصرفات من بعض الاخوان خارج الوطن فعلا البعض منهم تتمنى
    انه ما يكون سعودي وما خفي كان اعظم . تقبل تحيتي اخي (صاحي)​
     
  10. فهد العتيبي

    فهد العتيبي مراقب عام مراقب عام

    3,016
    8
    0
    ‏2008-01-13
    معلم
    هذه التصرفات والسلبيات ماهي الا تفريغ لما يحصل من كبت في الداخل ..


    قصة جميلة وأسلوب رائع ..

    يعطيك العافية وتشرفنا بتواجدك بيننا ..
     
  11. مـنـاحـي

    مـنـاحـي عضوية تميّز عضو مميز

    9,407
    60
    48
    ‏2008-01-18
    ذكر
    رحم الله من مات مني ..!
    ـــ رتانيا ـــ

    أهلا وسهلا بك ...

    شرفتي موضوعي وزدتي الموضوع تألقاً بإضافتك ... وشكرا لك ع الإطراء الجميل ...


    ـــ صمتي سؤال ـــ

    مرحبا بك ...

    أسعدني تواجدك ... وتعليقك الرائع ... شكرا لك حضورك وتفاعلك ...


    ـــ تهاويل ــــ

    حياك الله ....

    مشكورة لك ... وإذا ع المواهب فهي كثيرة ... بس ما من بركة خخخخخ


    ـــ عساف الخيل ــــ

    أنورت وأسفرت صفحات الموضوع بحضورك ...

    أهم شئ أنها أعجبتك ... ولا أنت وش يعجبك ....خخخخخخخ


    ـــ أبو رغد الشريف ـــ

    أرحبوووووووووووو .... والله أن ترحب ...

    أيه يارجال أستار أكاديمي مرة وحده ... أجل شايفني مانيب قدها .... ههههههههههه

    لا يارجال أنت وعساف خلوكم بمكانكم .... وأنا أعرف وين بيقبلونكم فيه ...


    ـــــ صديق المعلمين ـــ

    نورت الموضوع بوجودك ....

    أشكرك من أعماق قلبي .... ع حضورك ....


    ـــ بدر البلوي ـــ

    أسعدني تواجدك ... وتشريفك لموضوعي ... ومشكور يا ئشطه ....


    ـــ وارث الطيب ـــ

    هلا بالطيب وارث الطيب ...

    شرفني تواجدك ... وتعليقك الرائع .... شكرا لك ولحضورك ....


    ـــــ البواردي ــــ

    أهلا وسهلا بك

    حضورك ... شرفي لي ...

    ومشكور ع إضافتك .. وتعليقك