اعلان 1 اعلان 1 اعلان 1 اعلان 1 اعلان 1 اعلان 1


النــزالــه# وما ادراك ما النزاله

الموضوع في 'الملتقى العام' بواسطة ۝ مرافئ ساكنــــه ۝, بتاريخ ‏2010-02-17.


  1. ۝ مرافئ ساكنــــه ۝

    ۝ مرافئ ساكنــــه ۝ تربوي جديد عضو ملتقى المعلمين

    136
    0
    0
    ‏2009-09-07
    السلام عليكم ورحمة الله وبركاته

    ابي ارجع للوراء ........... عشر سنوات او اكثر او اقل

    ما اعرف با التحديد
    المهم //

    اذا جلسنا مع كبار السن الله يحفظهم لنا ومع الي عاصروا ها الموضوع مو شرط كبار مره

    ادري تبون الزبده اصبروا .. ادري اننا في عصر السرعه وعيال الوجبه السريعه

    كأني مصختها جايتكم في السالفه

    اذا جلست مع ناس اول يتكلمون بأشياء وعادات تسمعها وكأنها غريبه عليك وانقرضت واندثرت
    وهذا في بعض الأحيان رحمه لنا من ربي

    من ضمنها هذي العادات

    حكاية ... النزالــــه وما ادرك ما النزاله >< لا يروح مخكم بعيد مهيب استنزال جن وطيران


    النزاله هي ان اذا شريت بيت جديد ملك لازم تسوي نزاله عزيمه كبيره ومصاريف يعني فوق ما
    هو ظهرك منقص

    من التكاليف مشترى البيت تحط نزاله والا يضحكون ويعيبون عليك الجماعهـ د< اشوا اني ما لحقت على ها الوقت


    تفاصيل النزاله تابعوا في قصة ناصر..& وحصه



    ناصر وحصه تزوجوا وسكنوا في شقه صغيره يدوب على قدهم يعني تفتح الباب تلقا نفسك في

    المطبخ وتلتفت يسار غرفة النوم


    تلتفت يمين حمام وانتم كرامه

    كان امل وحلم ناصر وحصه البيت الملك


    سعى له حصه وناصر وجمعوا ما وراهم ودونهم طبعاً حصه موظفه في مدرسه اهليه


    وناصر موظف في الإتصالات


    صكوا على عمرهم وحرموا انفسهم الكثير من الأشياء في سبيل


    التوفير لجمع قيمة البيت مر على زواجهم مدة 10 سنين طبعا ما فيه عيال يقال لك انهم بيخلونهم لما يشترون البيت دفعه وحده


    المهم ..

    جمعوا مبلغ من المال مو واجد ولا شوي ميسور



    وصاروا يبحثون عن بيت يشترونه مناسب لهم



    وفي يوم من الايام وحصه تغسل المواعين > اي مواعين كلها صحنين


    جاء ناصر ورمى غترته وقال لقيته لقيته يا حصه بيت صغينون مشكنم مفصل... لي ولك

    خمت حصه ناصر من الفرح وطبعا امتلا ثوبه صابون من ايدين الهانم

    وطارت ولبست عباتها وراحت مع ناصر تشوفه بعدها تم الشراء ومالكم بالتفاصيل



    بعدها صاروا يفكرون في الديكور والألوان واللمسات الإبداعيه لحصه وناصر.


    ناصر كل همه المدخل وقاعد يخطط انه يحط هنا شي وهناك شي ونافوره صغيره


    حصه احولت عيونها من الألوان من كثر ماهي تدور عن انسب ستاير وما شابه

    وعقب ايام وتعب


    اصبح البيت تحفه فنيه راااائعه


    تدخله تقول جنه من التصميم والديكور


    سكنوا البيت ...وجلس ناصر على الكنب الاسود ووضع المخده الملونه با الفوشي بين احضانه


    وجلست حصه بجانبه تراقب الصور في الحائط ما اجمل هذه اللوحه انا الي تراى اخترتها


    قال انا ادري يا عمري انتي ذوووق بس تعالي حصه

    لازم امي وابوي وامك وابوك اقصد الاهل يشفون بيتنا


    ويشاركونا فرحتنا حصه ايه اكيييد

    حصه خلاص ابي اتصل على امي وانسق معها



    ترن ترن ترن الأم هلا حصه حصه ها يمه مو جايين تشوفون بيتي



    امها هو هو وشفيك حصه


    حصه وشو يمه
    الام نسيتي النزاله
    حصه اي نزاله


    الأم الناس ايلا سكنوا بيت جديد يسوون نزاله ذبايح ويعزمون الجماعه


    حصه خلاص يمه ابي اقول لناصر

    اتفقوا على النزاله



    وجت العوائل والجماعه لليوم المشهود ( النزالـــه )

    مسكين ناصر فوق ديون االأثاث خساير حفل النزاله


    ذبايح وعصيرات وقهوه وشاي وكيك وحلا لخ لخ لخ


    وش صار بيوم النزاله


    المجلس مليان رجال بعضهم جالس على الأرض من الزحمه كل واحد جايب عياله معه


    الحريم يا الله من فضلك بزران وشغالات وجالسين بعضهم في غرفة نوم حصه


    ما لقوا مكان


    هذولي العاقلين اما البزران الوناسه منتشرين



    في تخريب المنزل لعب كوره تقطيع ورد الحديقه تكسير تحف شغالين كنهم مواجرين على

    التكسير

    حصه على اعصابها البنات في غرفتهاا وما خلوا شي ما نشروه فوق السرير


    وناصر قاعد على الطاوله ما لقى مكان والدله في يده بس يصب لها الشياب


    شوي شوي بدوا يطلعون اخر واحد اكرمكم الله


    لا تنسى يا ناصر تراى جايب لك نزاله كرتون كاسات


    ناصر ما قصرت

    وقفت حصه وناصر في مدخل البيت ونظرات الحسره على البيت في عيونهم كن جايهم هجوم
    اسلحة دمار شامل
    يتلفتون اللوحات مكسوره المخدات ملطخه با الكاكاو التحف مرميه السجاد ملطخ بطين وبلاوي


    الستائر متخرعه من البزران يتعلقون فيها يعني كل شي كل شي عليه السلام

    حصه تخنقها العبره شوي وتطجهاا

    ناصر تقع عينه على ورده في حاله جيده في الحديقه يفرح ويصرخ


    حصه هذي ما خربوهاااا يقالك يخفف عليها شوي حصه ايه زين والله


    بسرعة البرق يدفع الباب ولد يركض ويدهس أم الورده برجله ما عليش خالي نسيت الكوره عندكم سلام>>>>>> لو انا مكانه دفنته مكانها [​IMG]

    .............وهذه قصة النزاله ... طيعوني لا احد يحط
    نزاله
     
  2. ناصر الرحيل

    ناصر الرحيل عضو مجلس إدارة الموقع عضو مجلس الإدارة

    ‏2009-01-16
    معلم
    الله يعاافيك على القصه

    احلى ما فيها اسمي خخخخخخخخ
     
  3. الأعرابي

    الأعرابي تربوي جديد عضو ملتقى المعلمين

    1,623
    0
    0
    ‏2009-05-10
    لا زالت تحكمنا العادات والتقاليد في مثل هذه المواضيع ولا نستطيع ان نتخلص منها ، وليته بس على إنزالت بيتك بس ، عندنا حتى جارك لازم " تنزله قبل ماهو يسوي إنزالة بيته ".
    بالنسبة لي رممت بيتنا الكبير بمبلغ وقدره، وشي تعتيق وثريات وجبسيات والكنب غير شكل اللي بالصاله وأشياء كثيره وحطيت شي يسمونه بوفيه " نمليه " وهذا للتحف بس ، ما أطول عليك إنتقلنا للمنزل الجديد أنا والعائلة كاملةً أبوي وامي وجدتي وأخوتي ، وما خذينا إسبوع ألّا وجدتي الله يطول بعمره تقوم من سريره وتنام على كنب الصاله " كويس " ، والوالد أمد الله بعمره وشفاه يجيب من هالتمر " ويحشى " بسطول ولا عمرنا إستفدنا من " حشية الوالد " بل بالعكس لو تطب علينا الهيئة تحسبنا " نصلّح خمر "!، وأضيفي على ذلك " البزران" كل شوي "يويق عليك من دريشه " وهذا شيٍ يكسره وهذا كنبٍ يقمزه، أخطأ الشاعر عندما قال : أولادنا أكبادنا تمشي على الأرضِ ، إيه والبوفيه صار بدل مهو للتحف بس ، مثل محل أبو ريالين هذا شاحن وهذي " غدفه" وهذا " سعوط" وهذي " يد نجر!!! " بالله وش جاب يد النّجر للتحف!
    جميع ما ذكرت لا يقلل من قيمة الأسرة والعائلة والجماعة ، فأنت منهم وهم منك والمثل يقول " خشمك منك لو ...."
    والترابط الأسري والعائلي مهم جداً حتى ولو كانت فيه خسائر ، فهذه الخسائر آنيّه سرعان ما تزول ،وتبقى الأسرة والعائلة والجماعه جميع. وشكراً لكِ.
     
  4. صوت الشعر

    صوت الشعر ابتسامة بلا حدود عضو مميز

    7,839
    2
    38
    ‏2008-11-08
    إنسان بسيط
    ههههههههههههه

    سلميلي على سميّي .. وترى له عانيّة منّي ...عبارة عن طقم ملاعق ..ذهبية من قصر الأواني ..

    ,.,,,.,,,.,

    وتقبلي مروري
     
  5. مشرفه تربويه

    مشرفه تربويه مشرفة سابقة قديرة عضو مميز

    1,252
    0
    0
    ‏2009-06-20
    مشرفة تربوية
    صراحه مصيبه هالنزاله
    مالحقوا يفرحون ببيتهم بس هالزمن اندثرت
    شكراً لك مرافئ ساكنه وزين اسمي مو حصة كان ورطنا بالنزاله :)