اعلان 1 اعلان 1 اعلان 1 اعلان 1 اعلان 1 اعلان 1


نهائي مباراة .... ولا أحلى

الموضوع في 'ملتقى إستراحة الأعضاء' بواسطة صوت الشعر, بتاريخ ‏2010-03-14.


  1. صوت الشعر

    صوت الشعر ابتسامة بلا حدود عضو مميز

    7,839
    2
    38
    ‏2008-11-08
    إنسان بسيط
    بسم الله الرحمن الرحيم

    السلام عليكم ورحمة الله وبركاته

    التقى فريق الحفاير وفريق الخضاره على نهائي بطولة اتحاد وادي الجرير>> البطوله مافيها الا الحفاير والخضاره



    والمقامة في استاد الشبرم



    وفي مباراة هي الاورع ووسط حضور جماهيري كبير
    وبين الزهور والتلال بين الطبيعه والجبال حكاية بنت اسمها هايدي >> المذيع مشفط
    وبحضور مندوب الفيفا في الشبرم (جانا يقول انا مندوب الفيفا عطوني قطتكم .. وعطيناه القطه وراح ولهالحين ماشيف )



    وبحضور ابو جندل اكبر سروق عرفته ضلعان النجج...
    وبحضور جمعاً من الوراعين وصبيان الغنم....
    وواحد من الشيبان حاضر المباراة ويقول علموهم يمسكون مقامط اللعب ..ماندري عاد وش مقامط اللعب ...
    [​IMG]





    وصالح كامل مدير قناة art جانا على ددسن 93 شطرطون ...
    يقول ابا اشفركم وعيانا .. قال ياولد ابا اشفركم واعطيكم دراهم لو من ورا الثوب..
    قلنا لا لا مانقدر...



    وحدثت مشكلة قبل المباراة وكادت ان تؤجل المباراة بسبب اختلافنا على اللبس مع حقين الخضاره .. هم يقولون نبا نلعب بثياب بيضاء...
    وانتم البسوا ثياب شتويه عشان نفرق بين بعض ..
    المهم انتهت المشكله انهاءها ابو جندل راح للنادي حق عفيف وسرق ملابسهم (كانوا غاسلين بدالهم ومشرقينها في حوش النادي وجاء ابو جندل ولاعاقت معه )..




    نزلوا الفريقين للملعب...
    لاعبي الفريقين كلهم داخلين الملعب لابسين بشوت على التكاميل ومحلقين لحاهم عشان فيه تصوير وبعضهم داخل بسبحه..
    ولاعبنا ابو جندل كاتب على صدره "المكافحة في قلوبنا"..
    وانا كابتن فريقنا داخل للملعب لابس بساطير ليا نص الساق (جزمات) حقت الحرس (صارفينها لي قدم يطردوني) .. و أول مادخلت الملعب جو المصورين يعدون يمي يصورني ..
    واعاين فيهم بنص عين ..احلى احلى تصوروني.. فكيتوا معي ؟؟...




    وبما اني كابتن فريقنا رحت لكابتن فريق الخضاره "النصري" وخامسته وناقرته بالخشوم عشان الكاميرات تصورنا...
    يوم خامسته ويعطيني خيشة ليمون اسود (تبادل الهدايا) يوم عطاني الهديه وانا مامعي شيء .. نزلت فنيلتي وعطيته (اشوفهم دايم ينزلون فنايلهم في التلفزون اثره مغر عقب المباراة)



    يوم نزلت الفانيله والحكم يطردني !!



    رحت للحكم وقلت ليه ياخي ؟؟
    يعني منقهر مني عشاني العب وانت حكم؟؟ ..انت زعول؟؟
    قال لا عشانك نزلت فنيلتك .. ممنوع





    >>>مدربي الفريقين وابرز اللاعبين واحداث المباراة <<<




    مدرب فريقنا السوداني حق المحطه اسمه حافظ ضوء البيت ...ملحوس وضارب فيوزه..
    ومعنا المطوع (خضراء) طبيب الفريق .. إذا اُصيب لاعب يجي يقرأ علاه ويرش عليه عزيمه ... ويطيب



    وحقين الخضاره مالهم مدرب ..جابوا مدرب بس سطروه (فلقوه) وانحاش ... يقولون يسوي حركات مالها داعي >> عشانه جاء بـيسوي تدليك لسيقانهم



    ابرز لاعبينا
    معنا اللاعب الجعلا وهو قصير (قزم)
    وهو اللاعب الوحيد اللي يقدر يشوت البلنتي بركبته
    ومعنا زمام التمر ..سهران ومتقروش..
    ومعنا خشمان فركوحه نجم الفريق ..




    وفي المقابل ابرز لاعبي الخضاره اللاعب بعير الفصام وهو طويل بالمره..
    يقولون انه يغير بويـبـينة اللمبه وهو واقف بدون سلم من طوله .. يفرهااا والزقاره في فمه ...
    وكبتنهم النصري .. اذا قطعت الكوره منه يلحقك ويهفك بجمع




    صفر الحكم >> يصفر بأصابعه



    بدت المباراة وصار فيها أهداف واجد والحكم ماعاد يشوف الأهداف من الغبره لان اللاعبين إذا وصلوا للباب قامت غبرتهم تقول يتطارحون ومن كثرة الغبار صار الحكم مايحتسب الهدف الا لين اللاعب يحلف انه جاب هدف...



    يحلفه الحكم .. جبت هدف؟ ..احلف؟
    اللاعب: ابك يابن الحلال والله وفي ذمتي اني جايبن هدف >> صورة واحد يحلف وهو يحرك يده اليسرى
    ويرد الحكم : جعلها في رجلك تسانك تساذب
    وصار كلن يمت الدين من عنده ...




    ابرز الأحداث:



    الخضاره كان معهم لاعب اسمه سلا العنز حق تعليقات ويستهبل ..
    وضيع علانا اكثر من هجمه ..
    الهجمه الابرز اللي خربها
    هي هجمة لاعبنا خشمان يوم رفعله زمام التمر الكوره وينقز عليها قدام المرمى وسلا العنز يقول لحظه ياخشمان ..
    يوم قالها والكوره تثبت في الهواء وخشمان ناقز في الهواء وثابت...
    قال سلا العنز : سكر فمك ياخشمان ..
    وخشمان يترك الكوره وينزل يطرده بيصفقه..





    وفي منتصف الشوط الاول زمام التمر طلع وخلا المباراة كان سهران وقلب علانا يقول "انتم متعاونين ودبابيس كلكم .. والحكم مرسولن علي بيطرحني"



    ولاعب الخضاره بعير الفصام طلع يقول البل (الابل) يمديها ضوت بروح اصب لها ماء وبروح ارضع الجفار ..





    وقبل نهاية الشوط الاول.. لاعب الخضاره محماس استفرد بحارسنا وحطها كبري
    وراح يعدي للجمهور بس الجمهور قاموا يحذفونه لانه ماجاب هدف .. كيف ماجاب هدف وهي كبري ؟؟



    لان حارسنا كان واقف جنب المرمى.. ناشبن للورعان اللي يجيبون الكور .. مغر يناقرهم.. مواصل واذا شافهم قام يهبـيهم ويقول : يارحنبو ذا الوجيه ...
    وجاه محماس وترك المرمى وحطها كبري فيه ...يعني ماجات في المرمى







    وفي بداية الشوط الثاني الحكم عطانا بلنتي لان واحد من لاعبين الخضاره ولع زقاره في الملعب...



    وجاء مدربنا المنلحس يقول ابا اشوته ..
    يابن الحلال فكنا منك!..
    قال حرااام مايشوته غيري ..



    وبالمبادي وحب الخشوم وبتلتلت الأزره وافقوا فريق الخضاره نخليه يشوت ..
    شات الكوره وصدها الحارس يوم شاف الحارس صدها وهو يروح يعدي يعدي يم السياره ويطلع مفتاح العجل ويجي بيضرب الحارس دوب مسكناه
    .. ورداناه وهو يتوعد يقول والله ما اخليه فيها ... وعقب المباراة سرا يطرده مارداناهم الا بالدداسن من دون الجفشريه...



    وقبل نهاية المباراة لاعبنا الجعلا طاح وقام يشر يم لسانه يعني بلعت لساني يوم شفته واروح للدسن واجيب الزراديه واجيه اعدي
    يوم جيت بحط الزراديه في فمه عشان اطلع لسانه .. قام وقال: أأأأأأأأأأأأأأأأأ.. العب علاكم بس ابغاهم يطلعون صورتي ..




    وانتهت المباراة بفوز فريق الحفاير .. 14 – 3 >> 10 اهدف من خشمان يمعطها بالدين عند الحكم





    وبعد الفوز هاضت قريحة شاعر الفريق ابو ركايح .. وقال هذه القصيده:

    تسعين دقيقه ماعلينا سرا.....>> نلعب بوزره (الوزره هي تنورة الرياجيل ..يلبسونها اليمانيه)
    نلعب على جل الحصى والهراسي >> الهراس الشوك الدائري اليابس اللي يجي في اذناب الشياه (من غير هالشان)
    جتنا الخضاره بتيم المشاكيل >> تيم يعني فريق بالانقليزي حطيتها هنا عشان يضبط الوزن وعشان اعلمكم اني مثقف حج وحاجه.. والمشاكيل يعني الطيبين .. هاه اي خدمات ثانيه ؟؟.. يعني كل كلمة لازم اترجمها لكم؟ .. قاموس انا؟
    يقودهم شرشور صعب المراسي
    وجانا ابو جندل بحزمة بناطيل
    وصالوا وصلناهم بلعبن حماسي
    وسط العجاج المفترتس والغرابيل
    فزنا وانا مالعبوني اساسي
    وزمام ابو تمره كما نجمة سهيل
    ولخشمان فركوحه ماني بناسي






    .............
    (واعذرونا على رداءة الصوره .. لاننا مصورينها بالجوال من صورة كاميرا فورية)


















    ____________________________
    انتهت



    جميع الحقوق ماهيب محفوظه واللي يبغاها ياخذها الله يجعلها صدقتن عن ابوي..
    قصرت معكم بشيء ؟؟... ها لاتنشبون في حلقي ..

    __________________
     
  2. ريناد&

    ريناد& تربوي جديد عضو ملتقى المعلمين

    366
    0
    0
    ‏2010-01-10
    في رجا خير
    هههههه نهائي خطير يا السبيعي

    عقبال العالميه
     
  3. عـزف منفرد

    عـزف منفرد عضوية تميز عضو مميز

    6,697
    0
    36
    ‏2009-10-01
    مُـعلـِّمـةٌ
    [​IMG]



    السبيعي ممكن ترجمة !؟ [​IMG]
     
  4. عمر الزهراني

    عمر الزهراني <font color="#990000">مراقب عام </font> مراقب عام

    6,050
    0
    0
    ‏2010-01-31
    سؤال محرج جدا جدا جدا
    بصراحة شكل اللي نقلنا الاخبار مو من السعودية ، ممكن تغير اللهجة ياأبو داليا
    ولا عليك امر ههههههههههههههه
    على العموم الله يعطيك العافية وماقصرت
     
  5. دكتــ عتيبه ـوور

    دكتــ عتيبه ـوور تربوي جديد عضو ملتقى المعلمين

    7,523
    0
    0
    ‏2008-12-13
    تيتشر
    هههههههههههههههه الاخ محمد رمضان
     
  6. صوت الشعر

    صوت الشعر ابتسامة بلا حدود عضو مميز

    7,839
    2
    38
    ‏2008-11-08
    إنسان بسيط
    المترجم الدكتور ...أو أبوغلا إذا جا
     
  7. دكتــ عتيبه ـوور

    دكتــ عتيبه ـوور تربوي جديد عضو ملتقى المعلمين

    7,523
    0
    0
    ‏2008-12-13
    تيتشر

    [​IMG] كم تعطيني نسبة ​
     
  8. هدوء إمرأة

    هدوء إمرأة عضوية تميز عضو مميز

    19,372
    0
    0
    ‏2009-02-02
    مستوره والحمد لله
    ههههههه
    الخلاصة :
    من فاااز في المباااراة ؟؟؟؟؟؟؟؟
    جاااني دوااار البحر [​IMG]
     
  9. صوت الشعر

    صوت الشعر ابتسامة بلا حدود عضو مميز

    7,839
    2
    38
    ‏2008-11-08
    إنسان بسيط
    لك قيمة تذاااكر فريق الخضارة ..
     
  10. مـنـاحـي

    مـنـاحـي عضوية تميّز عضو مميز

    9,407
    60
    48
    ‏2008-01-18
    ذكر
    رحم الله من مات مني ..!
    أي دوري صارت فيه هالمباراة ..!!
     
  11. مشعل

    مشعل عضوية تميّز عضو مميز

    4,905
    0
    0
    ‏2008-03-17
    معلم
    كان عمر المهنا

    متضاايق من الحكم في برناامج صاافرة