اعلان 1 اعلان 1 اعلان 1 اعلان 1 اعلان 1 اعلان 1


في بيتنــــا نفااااااس :)

الموضوع في 'ملتقى عالم حواء' بواسطة أبلة إنجليزي, بتاريخ ‏2010-07-03.


  1. أبلة إنجليزي

    أبلة إنجليزي مشرفة سابقة عضو مميز

    2,739
    0
    0
    ‏2009-05-02
    أبلة إنجليزي
    <<<السلام عليكم ورحمة الله وبركاتة


    وأنا أحووووس لقيت لكم هالمعانااااة الصدززززية وفوق هذا تموووووت ضحك <<طالعة من القلب


    أتمنى لكم وقت ممتع ..








    أنت/ي عزوبي تعيش في وسط عائلتك ؟
    2- هل أنت/ي موظف أو طالب ؟
    3-هل لديك أخوات متزوجات ؟
    4- هل أخواتك مكاين تفريخ ؟
    5- هل حصل في يوم من الأيام وعدت من الدوام تعبان وتافلـن العافيه وراسك يرقل من قلّ بركه
    لـ تتفاجئ بأصوات ضجيج صادره من بيتكم تصل إلى مسامعك قبل أن توطوط عتبة الباب ؟
    6- هل حصل ودرعمت لبيتكم لـ تستقبلك رائحة الحلبه المنتشره في كل دعاسيق البيت في الداخل ؟
    7 -هل استيقظت مذعوراً من نومك الهادئ ذات ليلة على
    زعاق بزر توهـ لحمه حمرا مابعد تعلم وشلون يصيح بإحترام ؟
    8 - هل زد رأيت تجمهراً أمام باب حمام بيتكم - الله يعزكم - ويوم قربت شوي كودك تشوف وش السالفه وبالطق والطقاق دخلت راسك من بين حشود المتجمهرين ولاها أمك واخت ماسكين نفس قطعة اللحمة الآنفة الذكر وجالسين يسبحونها ؟
    9- هل سبق أن رجعتـ ي من الدوام لتجدين بيتكم مزدحم بالزوار تسنه اللسيفوي ليلة رمضان
    ومن لمحت أمتس طرف خشتس مدت لتس الدله بدون تفاهم وقالت قهوي العالم ؟

    إن كانت أغلب اجوبتك عزيز تـ ي القارئـ/هـ بـ نعم .. فـ مبروك في بيتكم نفاس [​IMG]

    ليه ياربي كذا [​IMG]

    يعني الواحد يقول اللهم لا إعتراض بس ولو للصبر قالوا حدود يا مصبر الموعود كل يوم اقول بيجي رجلها ويقشعها
    هي وذرّها من عندنا بس ماش ماحولك أحد .. الله العالم الولد بيصير عمره سنه وهي توها نفاس ما قضت

    يا جماعة الخير لا تفهموني غلط .. انا احب اختي واقدّرها والود ودي ما تفارقني ..
    بس احبها لحالها بدون الفوائد الي طلعت فيها من زواجها ذا القرود الي معها منيب اواطنهم !
    عيال اختي ايه ما قلنا شي ! بس فيهم بثاره تيزي بلد .. !
    لا واذا تحملناهم وقلنا معليش توهم صغار والحشمه لأمهم مهيب لهم ..
    ونبلع هالغثا الي يصير على شرف ذا النتفه الجديده الي جدعتها ..
    تحسبونه يثمر والا يبين فيهم ؟ من يصير طول هالنتفه شبرين اول كلمه
    ينطقها ويقولها لك " كل تبن " !

    خلوّا خلوّا ذا على جنب مهب موضوعنا .. الي غابني صدز هالـ 40 يوم الي اشوفهم ..

    سبحان الله عمر الحريم ما احترموا مواعيد والا وقت الا بـذي ! يتحروون الدقه بالحسبه .. 40 يوم بالضبط مستحيل تنقص بس ممكن تزيد 40 يوم وانحن ما عندنا غير فاتحين باب و راديّن باب.. مستقبلين زوار ومودعين زوار .. مدخلين فلانه وبناتها ومطلعين فلانه وحريم عيالها .. لا وكله كوم واذا جت وحده الله يجزاها خير بزعمها راعية واجب وتكت من عقب المغرب إلى 9 عندكم وانتي يا حيل الله مالتس الا تدورين بهالقهوه والشواهي .. واذا خلاص تكرمت و لبست عباتها وطلعت .. ترجع بسرعه وترفع نقابها وتزف لتس الخبر العذب " معليش ترا بناتي ماقدروا يجون اليوم بلاهم منشغلين شوي بس باتسر بحيل الله بيجون كلهم "<-- ماودكم تشوفون تعابير خشتي ساعتها

    مير الله يجزاتس خير راعية واجب ! الحين بناتتس عندهم التزامات ومشاغل وبيسون الواجب حسب فضوتهم .. ! بس اصحاب البيت عطّاليه ما وراهم شغل والتزامات ابد .. على حسابكم هم ؟ قايلين لكم رقاصه انا ما تبدا ورديتي الا 1 بالليل و ورا ! نعبنو ابليسكم يالملحجه ترا فينا الطالب وفينا الموظف مايرجع الا على حروة المغرب وفينا المتزوج وعنده بيت يصاليه .. ! والأم مهيب بكل الأحوال بصحتها وفيها حيل تهابد وتراكض لكم انتم وزياراتكم !

    ياخي خلوا جيتكم وحده وموعدها واحد .. مهب كل القبيله تجي تزور
    وكل يوم وحده داخله لحالها .. لعنه ! ماروانا الا انتم ؟

    <---- حولكم شي تخافون عليه ابعدوه عنها ترا شاشت هالعبد[​IMG]

    ماخليت شي عن امي .. يمه حددي يومين بالاسبوع يجون العالم فيه !
    يمه مالها سنع تاركين الدعوه سايبه تقل والله الي عندنا عنز والده في حوش مفتوح
    وكل شوي جاي شايب والا بزر يويق عليها !
    يمه ارحميني ارجع من الدوام ما اشوف مالي خلق اغير ملابسي وش عاد اقابل هالأمم !
    بس ابــــد ! كان ذا الجدارن الي وراكم تنطق فـ هي ترد علي ..
    مير اول كانت تقول " يا كبرها عند ربي ! تبيني اقول للعالم لا تجونا .. انهبلتي انتي "
    الحين انا قلت قولي لهم لا تجون ؟ قلت حددي لهم يومين وفكينا من هالقلق !
    " لا يا خزياه .. قولة لا تجون الا هاليومين زي قولة لا تجون ابد ..
    افرضي هاليومين ما ناسبوا العالم ! "
    اجل مناسبنا انحن الاسبوع كامل يمه ؟!
    طاعوش انا ماعرف من الاسبوع الا الجمعه ولا هوب يصفى لي ؟!
    هالكلام اول .. الحين ابشركم مهيب ترد علي خير شر ..

    مقتطفات من أحاديث تدور في مجلس نفاس

    [ 1]

    " عسى ما تعبتي بس يا فلانه ؟ "
    " لا الحمدلله تيسرت "

    " الحمدلله .. بس لا تعلمين احد لـ انسألتي بسم الله عليتس !
    ترا عيون الناس مهيب ترحم وانا خالتتس ! "

    تعقيب / اول شي يـ الخاله الملقوفه ترا هالسؤال مهب كلـن يسأله يومتس
    توصينها ع الإجابه ! يعني ولاده وش ظنتس ؟ اكيد بتتعب بوقتها وعقب
    خلاص .. المشكله ما يسأل الا ناس مجربينها .. ملعون ابو التناحه يا شيخ !
    ثاني شي .. ترا حتى القطاوه تحمل وتالد !
    مهب حلى كل شي تلزقون فيه سالفة العين والنظله .. ياررربيه بس


    [ 3 ]

    "ما شاء الله وش سميتّوا الصغيره ؟ " .... " دانه "
    الحرمه الي تسأل وخشتها مايله والحتسي ما عجبها " اييه .. مدري تسن
    الأسم مهنا زود ! يا بنيتي مدري وش ذا الاسماء الجديده الي طايحين بها العالم ! "

    تعقيب / ترا اصغر بنات الحرمه الي سألت .. اسمها [ غزل ] !!

    [ 4 ]

    " الا يا فلانه ما قلتي لي وين ولدتي بأي مستشفى ؟ "
    " المستشفى الفلاني "
    " اييه زي اختي حصه ! عند اي دكتوره ؟ دكتوره هبه ؟ "
    " لا والله .. عند الدكتور خالد "
    الحرمه الي تسأل تنغز الي جنبها بكوعها وتعض على براطمها وتتحلطم "
    يا خزيييياه .. كابتّن عفشها عند رجال يختي خلاص هالحريم ماعاد فيهم حيا
    ! وراها ما ولدت عند حرمه .. وش حيث الرجال تولد عنده ؟ "

    تعقيب / يقولون والعهده ع الراوي .. ان خويتنا الي ماعجبها موضوع الولاده عند دكتور ..
    جايها الطلق وهي بسيارة ابو جيرانهم حيث ان رجلها كان كاشت في البر .. ومالقت الا جارتها تستفزع بها ..
    وما كان بين الولد والنور الا شوي لولا ان ربكم ستر والشوارع كانت فاضيه
    والا ان تسان صار مكان الميلاد في شهادة الولد .. " سيارة ابو جيرانا "
    الله يحرمّ ايديات امي نوره على النار .. لو هي سامعه السالفه ان تسان
    تكش بيدينها وهي تقول ( غربلهم الله .. شبكه تعاير منخل ! )

    طيب الحين فيه سؤال يراودني عن نفسي ومضطره اسدحه بس رجاءاً صيروا
    متحضرين شوي وماله داعي ترجموني بنعالكم <--- يا حياة الشقا متعوده وجه إهانات

    الحين الوحده اذا ولدت وش تجيب ؟ لا اشوف احد مستظرف وقايل تجيب آدمي
    ! ادري اننا محناب نجيب قطاوه ..
    بس قصدي هالآدمي الي هي تجيبه من هو حقه ؟ حق ابوه صح والا لا ؟
    طاايب .. اسم الولد يلحق مين ؟ يلحق اسم ابوه صح والا لا ؟
    طااايب .. دام الدعوه كذا .. ودام النفاس اصلا بسبب هالولد ..
    ممكن احد يفهمني وش دخل مندوب اهل البنت يبحلون بها ؟
    ورا مهب اهل رجلها هم الي يصالونها ؟!
    ياخي الولد ولدكم انحن وش دخلنا ؟

    والله ما خرب بناتنا الا امهاتهم !
    تجي الام مطفيه النور وطايره مليون بالحماس من تدري ان بنتها حامل .. ماتخلي عطّار ما تزوره
    ما تخلي شنق وداعوس ما تدعسق به .. كل شي ينشرب والا يوكل والا يلهم
    تجيبه .. وتفضي للبنت غرفه وتبلشنا نزلوا سرير ورقوا طاوله وجيبوا
    مفرش ورجعوا ستاره .. تقل اول مره يولد عندها احد ؟ واذا هي اول مره
    وشو له هالحمااس .. تراه نتفة بزر ونتق من بطنها مهب اختراع الله يصلحكم
    هذا انتم قبلنا حملتوا وجبتونا وش حيثكم ما سوا فيكم اهلكم كذا ولا
    ضركم ؟ بالعكس الوحده من اول لا اله الا الله صحتها فُل وهي والده في
    البيت .. ما ولدت بمستشفى وخذت لها سويت كامل اسبوع وماغير تبطح وبلع
    بهالحلى والقهوه حتى ولدها مهيب ترضعه


    ومن عجائب قدرة الله في خلقه ان الحرمة ما تحلى بعين رجلها الا لاصارت في بيت اهلها[​IMG]
    يالهيس وهي عندك في بيتك ماانتب تناظر خشتها .. ويوم صارت نفاس عندنا
    .. 24 تبن ناشب لنا ! ما عندنا شغله غيرك انت وحرمتك وعيالك !
    ياخي تحبهم وفاقدهم ضفهم ورح بيتك الله لايهينك ... وابشر بلي يجي
    يشقر عليكم كل يوم .. بس اعتقونا لوجه الله

    ولا يرفع ضغطي الا لا صار جالس مع حرمته يسولفون في غرفتها وانا
    بالصاله الي جنبهم اهجّد فروخ ابليس الي يفترض انهم اطفال و الارجح
    انهم عيال اختي .. يقوم واحد منهم يدخل على ابوه وامه ويزعجهم .. ويجي
    ابوه الله يطول في عمره يكرشه بكل حنان ويقول له " رح رح يا بابا
    لخاله ندى شفها تناديك "
    لعـــنه
    اول شي يا سبع البرومبا تراك ماكل في عيالك مقلب كبر راسك ! اجل تبيهم
    ينادوني خاله ؟ عساهم ينادوني بإسمي مهب بشيـن ثاني ويسد !
    ثاني شي وش قالوا لك انا ؟ خماّمة الضايع ؟! كل ما طق عود بعصى جدعتوا
    بزارينكم علي ؟ انتم تدشرون وانا اتحمل نتايج دشرتكم ؟

    نفسيتي تعورني .. !
    كل ما ذكرت ياخي هالأجانب طقتني غلقه وش زودهم عنا يا جماعة الخير
    يوم ان الوحده فيهم تولد من هنا وتصك الجينز من هنا .. ما توفي لها
    يومين الا وهي تقامز وتسوي رياضه
    ورا هالفقمات الي عندنا مهب تسذا
    وراهم 40 يوم ما عندهم غير فرم بهالمرقوق والجريش ! قال ايش .. ترمم
    جسمها قال ، مهب ترميم ذا ردم الله يحييكم

    الوحده منهن ما تطلع لبيت رجلها عقب الاربعين الا على شيول
    لا والكمخه اختي اقول لها ذاك اليوم ناه بس شوفي ترا ذا الصور عقب
    ولادتها باسبوعين - أأشر لها على صور لزوجة توم كروز - قالت .. واذا ؟
    لا تقارنين حبيبتي عيالهم هذولي عيال حرام !
    <-------- يالهدره يالكمخه يالفاهيه .. الحين نفاس ولد الحرام يفرق عن نفاس ولد الحلال !

    ياربيه بس !
    اسعفوني .. أريد حلاً ؟
    عموما انا بقوم الحين اصلي المغرب وانزل استقبل الوفد الجديد
    بس اتوقع اني ارجع اكمل تفلت
    والله يابي مّر مهب صاحي .. مهب رايح لين افرك البياله بجبهة وحده من هالزايرات !

    يع اشم ريحة حلبه



    <<<<< كتبتة فتاة تعاني من أخواتهاااااا :36_11_9[1]:
     
  2. عذبة المعاني

    عذبة المعاني مراقبة إدارية مراقبة عامة

    24,882
    40
    48
    ‏2009-01-10
    أنثى
    ..............
    ههههههههههههههههههههه
    خخخخخخخخخ
    فديت قلبك يااغلاتي
    أسلوب رااائع
    بس شكله من شدة القهر لاحول
    الله يسعدك ياارب
    أوجعتني معدتي من الضحك الله يوفقك يااارب
     
  3. أبلة إنجليزي

    أبلة إنجليزي مشرفة سابقة عضو مميز

    2,739
    0
    0
    ‏2009-05-02
    أبلة إنجليزي
    لبى قلبتس وكلتس ياسارونة
    حياتس فيذا واهم شيء أستانستي..

    لاتكونين من هالنوع اللي يبي يطرد خواتة :)
     
  4. عيوون ساجدة

    عيوون ساجدة مراقبة إدارية مراقبة عامة

    9,225
    0
    36
    ‏2010-03-02
    مـ ع ــــلمه


    هههههههههههههههههههههههه
    الله يرج ابليسك غشيت من الضحك
    حلوووة صراااحة وصف ولااااروع من حرّماابتسبدهااااا المسكينة..
    رااااح نتسلى بكراا عليهااا بالدووام مثلك خااابرة لاشغل ولامشغلة
    تسلمين يالغلا على النقل السُكرررة
     
  5. اغلا19

    اغلا19 تربوي جديد عضو ملتقى المعلمين

    12
    0
    0
    ‏2009-12-10
    معلم
    حلوة عندناعنزوالده في حوش مفتوح الله يرج بليسك
    صراحة مامعك حق امك صادقةياكبرها عاد نقول للناس لاتجون تراها فضيحة
     
  6. شذى الورد.

    شذى الورد. عضوية تميز عضو مميز

    7,469
    0
    0
    ‏2010-05-29
    معلمة
    هههههههههههههههههههههههههههههههههههه

    رهييييييييييبه والله مع اني مافهمت بعض من الكلمات خخخخخخ بس مررررره عجبني الاسلوب

    بس تعتقدون اخواتنا من جد كذا

    <<<<< تفكر معد تروح عند اهلها من بعد هالموضوع

    يسلموووووووووو ابله انقلش والله وسعتي صدري ضحكت من قلبي
     
  7. أبلة إنجليزي

    أبلة إنجليزي مشرفة سابقة عضو مميز

    2,739
    0
    0
    ‏2009-05-02
    أبلة إنجليزي

    يسلم قلبتس عالمرووووووور
     
  8. أبلة إنجليزي

    أبلة إنجليزي مشرفة سابقة عضو مميز

    2,739
    0
    0
    ‏2009-05-02
    أبلة إنجليزي
    شفتي شلوووووون الأم صااااادزة بس البنت متضااااااايزة

    حياتس يالغلا
     
  9. أبلة إنجليزي

    أبلة إنجليزي مشرفة سابقة عضو مميز

    2,739
    0
    0
    ‏2009-05-02
    أبلة إنجليزي

    نصيحة مني وأنا أختس أقضبي أرضتس ولاعاد تروحين لهم
    ..الأم ماههيب عايفتس بس البلا بالخووووات اللي تسذا :36_1_1[1]:
     
  10. لآلئ الجُمان

    لآلئ الجُمان تربوي جديد عضو ملتقى المعلمين

    2,119
    0
    0
    ‏2009-09-26
    معلمـــــــــه
    ريحت حلبه البسو كمامه [​IMG]
    [SIZE=+0]ههههههههههههههههههههههههه
    فطست ضحك
    الله يعينك ممــآ بلآك ربي به .. عقبالك ان شاء الله
    [/SIZE]
    ياحبي لخواااتي يوم اكون نفاس يحطوني بعيونهم الله لايحرمني منهم
    تسلمين ابلة انجليزي على هذا الموضوع الطريف