اعلان 1 اعلان 1 اعلان 1 اعلان 1 اعلان 1 اعلان 1


*البنات ايام زماان*

الموضوع في 'ارشيف المواضيع المخالفة والمكررة' بواسطة مشعل, بتاريخ ‏2008-10-17.


  1. مشعل

    مشعل عضوية تميّز عضو مميز

    4,905
    0
    0
    ‏2008-03-17
    معلم
    الكاتب

    القلب الشجاع (خوي القصيرين )

    البنات أيام زمان ,,,,,,


    --------------------------------------------------------------------------------


    الله واكبر ذيك الايام

    كان التعرف على بنت اول من اكبر المستحيلات

    كان اول اللي يتعرف على بنت انسان موعادي انسان خارق للطبيعه ( مثل ستيف اوستن )

    كانت البنت من رابع المستحيلات

    المقصود انك تعرف على الملكه اليزابيث الثانية اسهل من البنت

    وكان عندي ولد عمي كان اكبر منا ووجه ( حلو)

    احلي واحد في الحاره وفي خده حبه خال وعلى كتفه شامه وفوق عينه ثالوث وفي اصابعه دواحيس...

    بس الولد وسيم

    وفاكين معه البنات بس بالخفيه..

    ومره كنت نايم في السطح وجاني امر الله في الليل (بروح الحمام)

    واطل مع السطح والقى ولد عمي يمشي شوي شوي..(واثق الخطوة يمشي ملكاً)

    واشوفه جالس قدام دريشة جيراننا ..

    وشوي تطلع يد من الدريشة فيها عشر غوايش دقّة عبدالغني...

    واشوفها مادة له ورقه ..

    ما ادري وشي...

    الله من اللقافة فيني نزلت بسرعه بغيت اطيح من الدرج مرتين من الخفة..

    وافتح الباب الين خشته بوجهي...قلت وين جاين منه..؟؟

    قال من البيت

    قلت طيب الدريشة اللي انفتحت..؟؟

    سكر فمي وقال اسكت لحد يسمعنا...

    قلت وش اللي عطتك ( انا احسبها فلوس كان تقاسمناها)

    قال احلف ما تعلم احد...

    قلت قسم ( وين اميتاب باشان )


    قال عطتني صورتها

    قلت بذمتك

    كانت من المستحيلات اول...

    قلت ورنيها ولا بعلم احد ... ويعرفني فضيحة...

    بس حلفني بامي وابوي والاشاره اللي في الرقبة (جغ جغ) اني ما اعلم

    ووراني الصورة لين ذيك البنت اللي ناقظة شعرها وحاطتن ميه وعشرين بكله ...غير التوك...وغير الشرايط....

    ومصوره بدراعه مزلطه وزم...

    وهالعيون اللى مسبله...(بيني وبينكم صار قلبي يدق بسرعة احسبه مكينة ترانزام)

    قلت له ما عندها اخت..؟او بنت عم ..؟ او بنت خال؟ (عديت العايلة صار كل عايلتهم ذكر الا هي انثي)

    وصرت اذل ولد عمي كل ما بغيت شي هدتته ببنت الجيران...

    المهم

    طالت العلاقة وتتنظف ولد عمي وبانت عليه النظافه...

    واعرف انه بيقابلها من يوم يلبس ثوب ابو غزالين ابوكفته وشماغ العقل اللي لاعب فيه

    النشا كنه جالس تحت مظله والعقال كنه شايل ستبنه وطاقية الزري .

    غير الكبكات السمكه والقيطان وغير اربع اقلام في جيبه

    (المشكله ما يعرف يفك الخط)

    غيرالمسواك جنب الاقلام

    ولو اني مفتشه لقيت محايات وبرايات وعلبة هندسة...

    من يوم اشوفه كذا عرفت ان وراه دعثه..وانا كاتم اسراره لانه يدهن سيري

    ( بالمعني الاصح يرشيني او يشتري ضميري بحفنه من الدراهم او قليلا من الباسكويت

    او نصف غرشة بيبس)

    وانا ضميري رخيص اللي يدفع اكثر يشتريه

    المراد

    احسب ما يدري عن هالسر الا انا ...

    ما دريت ان نص العارض (الرياض) يدرون..

    كل من شاف واحد وراه الصوره وقال احلف ما تعلم احد....

    لان اول من يحصل على صوره لخويته يعتبر في نظر الاخرين مثل قرانديزر..؟؟

    ولكن فجاءة بدا يرد فيني ولا عاديعطيني الجزيه ...

    وبدا ينافخ علي ويتفل علي ويطقني وعرفت انهم نقلوا من بيتهم...

    هذا اللي خلاه يستقوي علي...

    ودارت الايام...

    واتعرف على وحدة من بنات جيرانا حلوووووووه عليها فرقه(فارقينها بدريل )

    بس الله يهديها قرويه تلبس منيخل وتحب تلبس الاحمر...

    وتلبس نعال شوكه...وعليها سلسال نسميه اول قلب..عليهسيفين ونخله كنها فنايل المنتخب...

    وعليها فلجه ابعد الضرس عن الضرس الثاني 2 سم كنهاقرش...

    ويدري ولد عمي ويجلس يراقبني وكنت في غفلة من امري وعرف وين اوزي صورتها...

    كان بيتنا طين وفيه حفر تفرخ فيه العصافير قمت وسحبت واحد من الاعشاش ورميته...
    وخليتها موزّى لي...


    المهم اكتشف المخبأ حقي...

    وجا في الليل وطلع الصوره وحطها في مخباته...

    وجيت الصبح انا وكشرتي...ابكحل عيوني بالصوره وادخل يدي في العش...ولا لقيت الصوره
    وادور في العش الثاني ولالقيتها...

    والثالث ومشيت على الاعشاش كلها...

    فقعت البيض وذبحت الحواقيل ولا لقيت الصوره...

    مؤامره

    توني نازل من السلم الاولد عمي جاي...

    قال وش تدور يالنمس يالملكع ..؟؟

    قلت ادور عصافير...

    قالعصافير ولا صوره جهيّر..؟؟

    من الروعة طحت على طرف الاثله اللي عند الجدار وينشق برطمي...

    ولا همني الوجع ... همني ان ولد عمي مسك علي شي...

    واترجاه وابكي عنده واحبب يدينه ورجلينه لا تفضحني استر علي الله يستر عليك وراك ولايا...
    (متأثر بالافلام المصريه)

    قال لي والله اللي شفته منك ذيك الايام من الذل والاهانة لا اطلعه على عيونك....

    شغلني عنده عبد...حتى آخر شي صرت اهمزه...والبسه نعاله واصك ازرته واكد شعره..واطيبه ( صرت مرته)

    وداخل طالع يتفل علي وانا امسحها واقول امرك سيدي..

    ويمسك هالذله علي خمس سنوات...

    وعاد ياليت البنت تستاهل هالمذله ( على غفلة انجلينا جولي )

    والله ان جدتي احلى منها بس على اصغر...

    حتى واحد من العيال يقول لى اول مره اشوف واحد يحب قرش...

    واللي يقول صدق هذي ادميه..؟؟

    واللي يقول وين تعرفت عليها في حديقة الحيوانات اللي في الملز..؟؟


    كل من مريت عليه من اصدقائي ذب علي كلمه....

    حتى واحد من العيال يقول اول مره اشوف رجال يحب رجال بس ناقصها سكسوكه...

    هذي قصتنا اول مع البنات...تغيرت الدنيا هالحين

    تعرفون اول مره جهير تهديني تعرفون وش اهدتني..؟؟؟


    معطيتني هدية سندوتش طحينية...!!!!

    هذي الهدايا الصح
     
  2. ضحوي آل الحارث

    ضحوي آل الحارث تربوي مميز عضو مميز

    4,676
    0
    0
    ‏2008-05-29
    English Teacher
    جغ جغ مأساه شكرا يا مشعل
     
  3. سعيد الحظ

    سعيد الحظ عضوية تميّز عضو مميز

    799
    0
    0
    ‏2008-01-19
    معلم
    غلق الموضوع اولى ...
     
  4. فارس الزعيم

    فارس الزعيم قــلم حــر عضو مميز

    2,161
    0
    0
    ‏2008-06-15
    حكومي
    الله يرجك يامشعل ذكرتني بالذي مضي

    والله زمان كل شي حلو حتى الحركات الخفيه

    صار تقول طحت على الاثله وانشق برطمك

    الله يسعدك على هالقصه الطريفه والجميله
     
  5. فارس الزعيم

    فارس الزعيم قــلم حــر عضو مميز

    2,161
    0
    0
    ‏2008-06-15
    حكومي
    الحمدلله انك منت مشرف وش ذا التحطيم
     
  6. وارث الطيب

    وارث الطيب عضوية تميّز عضو مميز

    1,530
    0
    0
    ‏2008-05-17
    معلم
    هههههههههههههههههههههه
    مشعل والله كفشناك
    وانا اقول ليش الرجال يحب الشعر وبالذات الغزلي
    ذكريات رائعه تسلم يالغالي