Maroom

Maroom

منقولة داخلي ومديرتي منقولة خارجي مافيه احد يعطيني اخلاء طرف وش العمل

ام محمد 123

تربوي
عضو ملتقى المعلمين
السلام عليكم


انا معلمة منقولة داخلي من مدرسة لمدرسة
والمفترض اني اليوم اخذ اخلاء طرف من مدرستي الاولى واباشر بمدرستي الثانية
وطبعا بعد حركة النقل الكبيرة مابقى مديرات فمديرة مدرستي الاولى نقلت والثانية نقلت
ومديرة مدرستي الاولى اخر العام قفلت غرفة الملفات واعطته الاشراف
ذهبت للتوجيه واخبرتهم بالامر ولقيت معي معلمات متجمعين بالتوجيه نفس مشكلتي
قالو لنا حضرو توقيع بالتوجيه
رحت اسال مديرة التوجيه متى تعطونا اخلاء طرف قالت لازم تجيبين لي ملفك وحصر بغيابك
قلت من وين والغياب من يعطيني اياه والنقل انا اشتركت بنقل لمدرستي الجديدة وشلون اروح للقديمة وهي بهجرة قالت ماعلي ابري ذمتي انا
طالت السالفة وجلسنا نناقش الموضوع معها اخر شي قالت خلاص تعالي وقعي حضور هنا بالاشراف قلت له المهم انا كمعلمة باشرت واخليت مسئوليتي
لكن فيه معلمات من نفس مدرستي الاولى ناقلات يقولون قالو لنا التوجيه داومو بمدرستكم الاولى
الان سؤالي وش الي يخلي مسئوليتي اداوم بالتوجيه الى ان يعطوني اخلاء طرف والان مشكلة ان الملفات مقفول عليها
والا اروح لمدرستي الاولى
وهل لازم اوقع بمدرستي الجديدة
الان اعاني من صعوبة النقل يحطني بمدرستي الجديدة ثم يمر علي نقل يودييني للاشراف اوقع ويرجعني معاناة ى
الله يجزاكم خير دلوني على الافضل لي والي يخلي مسئوليتي
 

1مهم1

تربوي جديد
عضو ملتقى المعلمين
الايوجد بالمدرسة وكيلة تنوب عن مديرة المدرسة
وكيف اخلي طرف مديرة المدرسة ولمن سلمت عهدة المدرسة
وإذا حدث واخلي طرف مديرة المدرسة دون وجود مديرة بديلة يتحمل مكتب التربية والتعليم التابعة له المدرسة مسؤولية اخلاء طرف المعلمات ممثلا في وحدة شؤون المعلمات
اتمنى اكون افدتك
 

ام محمد 123

تربوي
عضو ملتقى المعلمين
مدرستي الاولى مافيها ولاوحدة ادارية لاوكيلة ولا مراقبة مافيها الا المديرة بس ونقلت خلاص وسلمت العهدة للاشراف
والاشراف يقولون نعطيك اخلاء طرف بس جيبيلنا الملف والغياب
والملف مقفولة الغرفة حقت الملفات والغياب من وين اخذه
 

1مهم1

تربوي جديد
عضو ملتقى المعلمين
اذا كان مكتب التربية والتعليم مستلم عهدة المديرة
يكلف وحدة من المشرفات بالبحث عن الملف ويسلم لك عن طريق المكتب
او يرسل لاحقا بالبريد عن طريق الادارة بس يمكن يتعرض للضياع
 

1مهم1

تربوي جديد
عضو ملتقى المعلمين
ماذا تقصدين بالغياب حسب علمي المنقولة يؤخذ غيابها عند طلب النقل وليس عن اخلاء الطرف
ولايتم المطالبة بالغياب الا في حالات النقل الخاصة التي يمكن ان تكون اثناء العام الدراسي لان حصر الغياب حسب العام الدراسي
ويمكن يكون الغياب الاضطراري في حالة التعامل في حصر الاضطراري حسب السنة المالية
وبالنسبة للمرضي حصر اربع سنوات يجب على المديرة حفظه نهاية العام في ملف المعلمة
الله ييسر امرك
 

ام محمد 123

تربوي
عضو ملتقى المعلمين
مديرة الاشراف قالت لي حنا ماعندنا مشرفات يروحون لمدرستكم الكل نقل
والغياب تقولي جيبي الغياب والملف عشان نعطيك اخلاء الطرف

جزاكم الله خيرا
 

ام محمد 123

تربوي
عضو ملتقى المعلمين
مديرة التوجيه تقولي معلمة من مدرستكم تجيبون لي اقرار لها وتوقيع انها مسئولة تتطوع وتمسك الادارة وتخلص الامور
مافيه احد رضى يمسك المسئولية طيب
 

فل الحجاج

تربوي جديد
عضو ملتقى المعلمين
تعليم الرياض بنين

بعض المعلمين باشروا في مدارسهم المنقولين اليها داخليا دون الرجوع للمدرسة الاولى وتم رفع مباشرتهم أمس واليوم ..
ولكن بمجرد مباشره في مدرسة الجديدة يتم تظليل خانه لم يتم اخلاء طرفه في برنامج مدير نت .
 

أم فيصل

مراقبة عامة
مراقبة عامة
أم محمد الله يعينك وش هالديرة بسم الله
تعقيد بتعقيد كلهم نقلوا المديرات والمعلمات والمشرفات
ربي يخارجك منها على خير
ذكرتيني باللي يقول البطل مات والمخرج مات والمشاهدين ماتوا والتلفزيون انفجر
الله المستعان
 

toto معلمة تعهد

تربوي
عضو ملتقى المعلمين
ههههههههه

نفس المعاناه بس الفرق مديرتنا غايبه ومقفله المدرسة بكاملها بالطبه والمفتاح على قولتهم


بعض الزميلات حاولوا يتواصلون معها ابلغتهم برسائل انها بتغيب الاسبوع هذا وراجعوا الاشراف

رحنا امس الاشراف وقالوا لازم الملف الوظيفي وانتظروا مديرتكم تداوم

والمديرة مصره على انها
انها معطيه الاشراف المفاتيح

والطاسه ضايعه

واليوم غايبه هههه
 

ام محمد 123

تربوي
عضو ملتقى المعلمين
جهنية امين الله ينقلني منها على احسن حال
الكل نقل منها بالحركة التاريخية ماشاء الله

توتو معلمة تعهد اذكر مرة قلتي انتي بالقويعية انا بعد تبعها وفعلا فوضى غرفة ملفاتنا مقفولة والمديرة عطتها الاشراف والاشراف ماعرفو يحلون المشكلة بس الحمدلله انتم مديرتكم موجودة اقلها بتخلصون الاسبوع الجاي اما حنا الله اعلم متى بتنتهي مشكلتنا

واخر كلام لمديرة الاشراف تقول تروحين تداومين بالمدرسة الي فيها ملفك قلت لها طيب انا نقلت منها وقرار نقلي صادر قالت انتي تحاسبيني قلت لا بس وش اسوةي
 

1مهم1

تربوي جديد
عضو ملتقى المعلمين
لابد من ايصال صوتك لادارة التعليم
لان ماذكرتيه بشأن مكتب التربية والتعليم ان كان صحيحا فإنما يدل على فشل المكتب في القيام بدوره
وتكليف معلمة ليس من مهامك كما أن المعلمة لاتكلف بمثل هذا الدور
ومادام الوضع كما ذكرت فما انطبق على مديرة المدرسة ينطبق عليك
و لاحول ولا قوة الا بالله
 

toto معلمة تعهد

تربوي
عضو ملتقى المعلمين
ام محمد نعم انا تبع ادارة تعليم القويعيه

والفوضى عارمه بالنسبه لنقل وبالنسبه لتعينات الجديده
 

جتا + ظتا = غثا

تربوي
عضو ملتقى المعلمين
اختي ام محمد
اكبر غلطه لك انك قاعده تراجعين مكتب الاشراف ومصره للان تراجعينهم !
هذولا مايدرون وين ربي حاطهم

حبيبتي روحي بنفسك لادارة التربية والتعليم واستعرضي لهم مشكلتك
الله يسهل امرك
 

toto معلمة تعهد

تربوي
عضو ملتقى المعلمين
أم محمد وش صار على نقلكم واخلاء طرفكم

وتبع أي اشراف انتي نفس اشراف القويعيه ولا من الادارات التابعه له محأم
 

ام محمد 123

تربوي
عضو ملتقى المعلمين
تبع الرويضة
الحمدلله جت مدية جديدة للمدرسة القديمة امس الاربعاء وعطتني اخلاء طرف وملفي
تمرمطت هالاسبوع الحمدلله على كل حال اوقع بمدرستين القديبمة والجديدة
 

toto معلمة تعهد

تربوي
عضو ملتقى المعلمين
ماشاء الله قولي كذا تبع اشرافةالرويضه
كلاني تبع اشراف الرويضه برضو

وموعارفين راسهم من رجولهم
 
أعلى