هذا ما تم ...

السلام عليكم ورحمة الله و بركاته

تحياتي لكم جميعاً

طبعاً اليوم لنا مع الوزارة قصة جميلة ، أحكيها لكم من فصلها الأول

تواعدت أنا و أخي أبو محمد ( المبدع1 ) يوم الخميس الماضي على زيارة الوزارة يوم الأثنين و اتفقنا على هذا الموعد .

صليت فجر اليوم ، و كنت ناوي على المشية بعد الصلاة مباشرة ، بس الأمورة ( رنيا ) قالت ... توديني للمدرسة بعدين تروح للي تبي ( حكم القوي على الضعيف ) .

طلعت من القصيم ( بريدة ) الساعة 6:45 و وصلت الرياض الساعة 9:05 ( لا أحد يعلم ساهر ) .

و لأن الرياض ما فيه زحمة أبد أخذت أول طريق الملك فهد ، بعدين قلت أغير الطريق لعله أخف زحمة ... حولت على طريق العليا ( و جاء المثل اللي يقول أمسك قردك لا يجيك أقرد منه )

الساعة تقريباً 10:00 دخلت الوزارة ... كان أبو محمد ( الله يعطيه العافية ) ينتظر بالوزارة

طلعنا على مكتب الأستاذ صالح الحميدي قالوا في اجتماع و يجي بعد الظهر

نزلنا و أخذنا لنا راحة شوي ، بعدين جتنا فكرة ... ليش ما نروح للدكتور سعد

ركبنا سيارتنا و طلعنا على وكالة الوزارة ، دخلنا مكتب الدكتور سعد

قالوا الدكتور سعد طلع على المبنى الرئيسي للوزارة في اجتماع

تكلمنا مع مدير مكتب الدكتور سعد ... مختصر الكلام .. تبي تنقلون إن شاء الله في هذي الحركة على رغبتكم الأولى ... عموماً ... الرجل مع احترامنا و تقديرنا لشخصه الكريم لكن كلامه غير مهم بالنسبة لنا .

رجعنا على الوزارة ... انتظرنا إلى بعد صلاة الظهر

طلعنا على مكتب الأستاذ صالح الحميدي ... قابلنا الأستاذ صالح

محور الحديث كان حول تصريحه بالإخبارية ... النتيجة اللي انتهينا فيه منه هي

يقول المثل ( مالك إلا ولد يقرأ ) ... و أنا أقول ( مالكم إلا زوجات ينقلون )

رجعنا إلى نقطة الرغبة و التصريح فقال ... التصريح الذي ذكرته بالإخبارية و الذي سمعتموه هو اللي رايح ينفذ *(*أي الرغبة الأولى للجميع ) .

انتهينا من الحميدي و نزلنا للفهيد ... طبعاً الفهيد كان باجتماع من الساعة 10:30 حتى الساعة 2:30 .

و علشان نضمن مقابلة الفهيد جلسنا داخل الوزارة و نرقب عن بعد سيارته

الساعة تقريباً 2:30 طلع الفهيد من الاجتماع .. قابلناه

سألناه عن الحركة ... و كان عند سيارته ... دخل المبنى و أخذ ورقة و قلم ... و جلس يشرح لنا

خلاصة الشرح ... الجميع منقول على الرغبة الأولى ( لم يرد ذكر للرغبة الثانية و لا غيرها )

لا مفاضلة بين معلمات التعهد و بقية المعلمات .

الحركة تقريباً في شهر محرم .

المنقولات في الحركة الإلحاقية سيبلغ هو إدارات التربية و التعليم عن طريق بوابة تكامل بإتاحة الخيارين لهن ...
إخلاء طرف نهاية الفصل الأول على رغبة الحركة الإلحاقية ثم إخلاء الطرف نهاية الفصل الثاني على رغبة الحركة الحالية .
أو
إخلاء الطرف نهاية الفصل الثاني على نتيجة الحركة الحالية .

كان خروجنا من بوابة الوزارة قرابة الساعة 3:00 ظهراً

أبو محمد راح يتغدى عند أم محمد ( يا عله بالهناء و العافية ) و تركني بالشمس ( لكن الوعد بعد الحركة إن شاء الله )

{ لا والله الرجال ما قصر لزم لكن أنا ما أستطيع }

عموماً هذي نتائج زيارتنا اليوم

لا تنسون الله لا يهينكم قطية البنزين حق المشوار

الغداء ما تغديت و إلا كان أحسبه عليكم



لكن*


قولوا آمين

الله يجعلنا بعد صدور الحركة نلتقي هنا جميعاً ، و كل واحد منا يبارك للثاني بنقله على الرغبة الأولى

المعذرة على التأخر ... توي واصل

مع أصدق و أعطر تحياتي لكم *
​