اللي ماقرا الحلقة الاولى هذا الرابط
يوم من أيام معلم تأبط الفقر
الحلقة
( 2 )
بدأت عجلات سيارتي بالدوران وخرجت من الحارة ، وبعد خمسة دقائق ، وكالعادة نشف ريقي وكدت ان أشعر بالكتمه وعلى طول اقرب بقاله عاليمين ودخلت على الهندي ويديني ترجف وبراطمي كنها ملونه بطبشور ابيض والا الهندي يقول : صديق ماااافي يجي هنا انا في كلـّـم شرطه مخدرات . تركت الهندي يبربر وزحفت الى الثلاجه وفتحتها بالحركه البطيئة واخذت علبة مويه ايضاً بالحركة البطيئة وشربت مويه . ناظرت للهندي بعد ماصحصحت ولما شافني اناظر قال : ايييس فيه انتااا ؟؟ ليش كدا ؟ جيب فلوس ، مديت يدي لجيبي والألم يعتصرني لأنه اخر ريال بقى معي !!!! ماذاااا ؟؟؟ ياااا إلهي !!! انا ولد ابوي !! الريال وينه ؟؟( واتذكر الريال اللي سبب المشكله بين العيال واللي انا قطعته قلت بس والله انه ريالي ) قلت ياصديق والله مافيه معاي فلوس لكن انا يعطي انتا بطاقه مال انا وبعدين انا يجيب ، قال اوكي ، سحبت بطاقة المعلم وعطيته ، قال انتا مئلم ؟؟!!!! قلت ايوه قال نو نو نو انا مافي ياخذ فلوس ، انتا واااازد مسكين ، ليش هزا نفر فيه كلام مئلم مافيه شغل كويس فيه نفرات سوي انتظار يبغى يصير مكان هوّا ؟؟؟؟!! قلت ياصديق ماني ناقص تقليب مواجع انا لازم امشي . ( ودعت الهندي ومشيت )
وانا ماشي وساهي واناظر للاشاره اللي قدامي الا لونها ازرق ( طبعا عندي مشكله في تمييز الالوان والطبيب يقول السبب هدر نفسي J )قلت ياسلام يالزعيم ودعست بطوف الاشاره الا يوم صارت صفرا قلت ولايهون العالمي الا الاشاره يوم صارت حمرا قلت اسمحلي يالوحده مايمديني اوقف وانا اطوفها وعلى ماتعديتها الا اللي يقول : على جنب ياصاحب السياره المدري وشو !!! ( صراحة ماالومه لانها صارت ماتنعرف من كثر الصدمات والطعجات ) فتحت الشباك وأشرت له بيدي يعني تعال جنبي طبعا وانا ماشي، قرب من سيارتي وصار يمشي بالدوريه جنبي والله واسحب بطاقة المعلم واطلعها من الشباك ،الا يوم قال العسكري لاحول ولاقوة الا بالله ، متى يعطونكم حقوقكم ويفكونا من نفسياتكم اللي ماهي مخليتكم تركزون بالقياده . خلاص خلاص واااصل واااصل طريقك ، قلت وانت شايفني موقف لك هههههههههه ( طبعا قلتها بقلبي ) .
كملت طريقي وناظرت على الطريق الثاني المعاكس الا هذا ابو ساعه متوجه عكس الاتجاه اللي يودي للمدرسه ، والله وارسل له كول مي، شوي ويرسل لي كول مي ، وارسل له كول مي انت ويرسل لي مافيه عندي رصيد الا ريال ونص كول مي انت ، وارسل له رساله قلت له : ههههههه لا انا عندي خمسة ريالات بتصل فيك الحين ( لحد يشره علينا شوي وننهبل ) ، اتصلت عليه وقلت خير وين رايح ؟؟ قال أبد بوصل زوجتي لمدرستها أبد خمس دقايق وارجع ، قلت اييييييييييييش ؟!! (ياجماعه زوجته معلمه ومدرستها تبعد 90 كيلو) فجأه واتذكر حالته ضحكت وقلت اوكي يابو ساعه اواجهك بالطابور الصباحي . ( ياجماعه سميناه ابو ساعه لان الوقت بساعته صار غير من خبر تحسين المستوى على اقرب راتب صار عنده مرض نفسي ضارب ابو عقارب الساعه في مخه من كثر ماهو مصدوم من الخبر )
على ماوقفت عند باب المدرسه ودخلت، والا اسمع الصراخ والازعاج بساحة المدرسة، واناظر ماني مصدق الا واحد من طلاب صف خامس ب ماسك الاستاذ مصلح وخانقه ويسحب فيه يمين ويسار، والاستاذ مصلح ماشاء الله عليه ماشاء الله عليه ( اذكرو الله ياللي تقرون ) رجلينه ثابته وباقي جسمه يروح يمين ويسار صاير كنه نخله وسط عاصفه ، واجي ابغى افزع الا مدير المدرسه يقول اصبر اصبر التعميم يقول : اذا ماسدحك الطالب في الارض مالك حق تمد يدك عليه ، قلت انا بصوت عالي يابو مصلح خله يسدحك عشان نفزع يابو مصلح خله يسدحك قال ابو مصلح : يخسي ويعقب مابقى الا هالنتفه يسدحني ، وانا اروح واكلم الطلاب زملاء الطالب قلت ياشباب شوفوا زميلكم ابعدوه عن ابو مصلح افزعوا يالنشاما ، تأثر الطلاب بكلمتي وراحوا وفكوا ابو مصلح وحلينا المشكله .
بدأ الطابور الصباحي وبدأت الإذاعه المدرسية ووصل الدور عند الطالب نفسه اللي كان خانق ابو مصلح وبدأ بكلمه عن المعلم واستشهد في بيت من الشعر وقال :
قــم للمعلم وفـّـه التبجيلا .... كاد المعلمُ أن يكون رسولا
بصراحه وبدون ماأشعر بنفسي وبإنفعال كبير سحبت المايكروفون من يده وارتجلت قائلا ً :
ياابني تراناااا مانبي تبجيلك
....... بس اكفناااا شرك ولا تزعجنـاااااا
اجلس مؤدب عاقل وياحليلك
...... يكفي تعبنااااا مانبي تتعبناااااااااااا
ولىّ زمان ٍ بالعصا ياويلك
....... وجانا زمن ينصرك لو تضربناااااااا
لوهي على القوه نحلحل حيلك
....... لكن وزارتناااا تبي تفصلنااااااااااااا
والا تراناااااا مانبي تبجيلك
....... بس اكفناااا شرّك ولا تدوشنااااااااا
صفقوا لي المعلمين وناظرتهم وانا ابتسم مبسوطا ً وفرحانا ً لتعبيري عن مشاعري ، وما دريت الا الورقه بيد المدير قلت له : مدهاااااااا قال شدهاااااااا J ، واناظر الا لفت نظر ومكتوب : نأمل منك عدم جرح مشاعر الطلاب .
...................
والى اللقاء في الحلقة القادمة
مع تحيات / تأبط فقرا ً
