Maroom

Maroom

نداء لأبو شهد ومن يهمه موضوع دفعتنا 23.....!!!

ابو عبدالله999

ابو عبدالله999

مشرف سابق
عضو مميز
اقتباس:
المشاركة الأصلية كتبت بواسطة ابو عبدالله999
بيض الله وجهك يابو شهد........... واصمل ولا تطلع الا بعلمٍ أكيد
موفق يابطل ...

وهذا ردك يابطل:
ووجهك اخوي ..... نسوي الي علينا والباقي على الله .... وانا والله داري ان الغالبيه ودهم يكونون في الرياض للاستفسار ودام احنا اخوه والانترنت والمنتدى ولله الحمد مقربنا لبعض ما يمنع نفزع لبعض ولو بالشي البسيط .... وترى روحتي وسؤالي شي بسيط ما يذكر عند شبابنا واخواننا ومن قاموا بالقضيه وراحوا وتعبوا وقابلوا الملك في عز الحر ,,,,,


المهم :
بشًر يا أبو شهد ... وش صار على روحتك للوزارة بخصوص السؤال عن فروقات دفعة 23بين التربوي والغير تربوي
ومتى ستصرف؟
وبارك الله فيك​
 
ا

ابو شهد

تربوي
عضو ملتقى المعلمين
الساعه 9 ونص اليوم الاثنين وانا رايح الآن اسئل عن الموضوع في ادارة التعليم .... صحيح اني صائم والفراش والله جنبي الحين يشكي لكن تراني ما نسيتكم وابشروا وهذي قومه وين الثوب والشماغ ....
دعواتكم لي بالتوفيق ..................
راجع لكم ...​
 
ص

صــالح العتيبي

مراقب عام
مراقب عام
ابو شهد قال:
الساعه 9 ونص اليوم الاثنين وانا رايح الآن اسئل عن الموضوع في ادارة التعليم .... صحيح اني صائم والفراش والله جنبي الحين يشكي لكن تراني ما نسيتكم وابشروا وهذي قومه وين الثوب والشماغ ....

دعواتكم لي بالتوفيق ..................

راجع لكم ...
هههههههههههههههههه

الله يوفقك​
أنقر للتوسيع...
 
ا

ابو شهد

تربوي
عضو ملتقى المعلمين
السلام عليكم ورحمة الله وبركاته
وهذا انا ولله الحمد وصلت البيت وفحمان وقوة عطش الحق يا ابو شهد شغل المكيف على البارد ترى ما بقي في الجسم الا كم لتر ماء عساه يصبرني للمغرب .............. المهم انا داري انكم تنتظرون وش النتيجه لكن !!
اعطيكم السالفه من طقطق للسلام عليكم :
ركبت السياره الصباح الساعه 9 ونص ويوم طلعت للشارع والجو حار وكاسة الماء يا اخوان تراودني تعرفون ابليس شاطر يوم تكون صائم المهم توكلت على الله وشغلنا ... ووينك يا ادارة تعليم الرياض ....
وصلنا ودخلت اسئل في شوؤن الرواتب قالي والله ما عندي علم لكن روح لشوؤن الموظفين رحنا هناك قالي والله ما وصلنا شي من الوزاره قلتله طيب وين اسئل ابي نتيجه ترى والله وراي مجموعه معلمين ومعلمات ينتظرون ردي لهم وانا قلت ما راح ارجع الا والخبر اليقين معي قالي اقولك : روح للوزاره اسئل هناك في شوؤن المعلمين قلت تم ... طلعت ووينك يا سيارة ابو شهد كأنك بعدتي عن اول تعرفون الحر اثر علي ... ركبنا السياره ووينك يا وزارة التربيه والتعليم وصلنا نزلنا من السياره وهاتك مشي تعرفون المواقف قريبه من شوؤن الموظفين حذفة عصي وتعرفون حذفة عصى عند البدو وش كثرها الله المستعان امشي وامشي المهم وصلت وهنا شفت العجب !!! ​

تقولي وش شفت ؟ ​

انا اقولكم ابشركم ترى وزارتكم تحفة راحت اش اثاث جديد واش بويات وش رخام وش مكاتب ما قدرت ادخل من الحوسه الي داخل كل شي جديد وانا اقول وين ميزانيتنا اثرها في اثاث الوزاره وخرابيطهم المهم طلعت الدرج وكان الدرابزين يا راجل انتظر احد يصورني عنده بس ما في احد .......... سئلت مؤظف بالله وين شوؤن المعلمين قالي الدور الثاني ... طلعنا الدور الثاني وعيني ما فارقت الدربزين هههههه ولقيت الدنيا حوسه يا جماعه ايش مكاتب فخمه واش دوالايب قمة الروعه الزبده الدنيا محيوسه والموظفين خارج مكاتبهم الاغلبيه سئلت موظف قلت بالله عليك تراني تعبت وين شوؤن المعلمين قالي الدور الارضي قلت سئلت تحت قالي الدور الثاني قالي هذا الي عندي حسيت ان الدنيا تصريف في تصريف ..... الشكوى لله نزلت تحت ولقيت سكرتير مساعد وزير التربيه والتعليم انا دخلت بس سلام عليكم اسئلك بالله وين اسئل عن موضوع دفعه من المعلمين قالي في شوؤن الموظفين قلتله : وين شوؤن الموظفين وتكفى لا تقولي الدور الثاني ... ضحك شوي .. وقالي لا والله نقلوه في مبني ثاني ... قلت : ليتك خليتها الدور الثاني اصرف .. وهاتك ضحك المؤظف ..
المهم قلتله اوصفلي تكفى وينهم / قالي خذ الوصف : تطلع من هنا وتاخذ الشارع يمين تعدي اشارتين وبعدها من تحت الكبري ترجع وبعده يقابلك فوال القرموش قلت طيب .. قال : تاخذ من عنده يمين ثم يجيك فوال الافراح قلت طيب تاخذ يمين من بعده شوفهم هناك ....
قلتله ممكن سؤال خارج الموضوع ؟ قال سم . قلتله : انت صائم اليوم وجوعان شكلك ..... طبعا ضحك شوي وقال ليه ؟ قلتله : يا اخي وصفك كله فوالين لدرجة اني جعت من كثر ما تقول فول وشكلي ابجنبك عنده الحين وافطر ... ضحك الرجال وقالي لا والله بس وش اسوي المنطقه فوالين كلهم ...
المهم طلعت على وصفه والفول يدور في راسي ... وصلنا الفول اوقف لا كمل المهم وصلنا الموقع ...
ويوم وصلت ونزلت من السياره : وهاتك مشي مع الحر اقول في نفسي يارب ما اطلع الا والعلم الاكيد معي ...
دخلت ولقيت الدنيا مكركبه مرررره والاثاث في الاسياب وكل شي جديد في جديد قلت ايوي وين اسئل طلعت الدور الاول ولقيت الموؤظفين قلتل لواحد منهم بالله ابسئل عن دفعة 23 التربوي وغير التربوي ورواتبهم ؟ قالي هذا في الوزاره مو عندنا موضوع التربوي وغير التربوي . قلتله تكفى توني جاي من ادارة التعليم ومنها قالولي روح للوزاره ومنها قالو لي روح لكم ؟
قالي : احنا ما عندنا شي عن الموضوع ...
طلعت من عنده وانا اقول ليه تصرفون يا ناس كل واحد يرمي عند الثاني ... طيب المشكله مو هنا ...
المشكله اني مواعد حبايبي اعضاء دفعتي من معلمين في المنتدى وش اقولهم ..... الله المستعان
ارجوا انكم تعذروني اني ما لقيت اية فائده من روحتي لكم ... لكن المهم اني جربت ... وان شاء الله راح اتابع في الموضوع .....
أخوكم / أبو شهد
وآسف على الاطاله​
 
ح

حبحر حار

تربوي
عضو ملتقى المعلمين
شكرا ابو شهد..

والله هذا حاااااااااااااااااااااااال جميع الدوائر الحكومية.. مستحيل تخلص معاملاتك في يوم او يومين لازم المماطلة...
 
ا

ابو شهد

تربوي
عضو ملتقى المعلمين
الله يعطيكم العافيه يا اخوان .... صدقوني كان ودي اجيب لكم خبر زين لكن الشكوى لله هذي وزارتنا وهذولي موظفينا انواع التصريف وانواع المماطله ..................
وانا اكتشفت ان ما في احد يعطيك خبر او حتى عندهم خبر عن الموضوع وكاننا منسيين الا واحد في ادارة تعليم الرياض قالي عند الوزارة خبر عن موضوعكم وواضح ما يبيلها شي ... يمكن هو الي عطاني شوية آمل في الموضوع .................
اتمنى لكم ان شاء الله خير جاي بإذن الله .............​
 
K

kkaa123

عضوية تميّز
عضو مميز
كفو أبو شهد
وصدقني صدقهم
فهم لا يعلمون لأنا لا نشكل لهم شيئا
ولو طلعت للوزير نفسه سيقول موضوعكم ليس عندي ولو ذهبت للخدمة المدنية سيقولون موضوعك ليس عندنا
ولو ذهبت للديوان الملكي سيقولون موضعكم عند الجهات المختصة
ولو سألت نفسك ماهي الجهات المختصة لوجدت أنك تسبح في فراغ
وحسبي الله على من ظلمنا اللهم اجعله للظالمين اية وعبرة
 
يجب تسجيل الدخول أو التسجيل كي تتمكن من الرد هنا.
أعلى